നിലമ്പൂര്‍ : മലപ്പുറം വഴിക്കടവ് മോട്ടോര്‍ വാഹന ചെക്പോസ്റ്റില്‍ മൂന്ന് ദിവസത്തെ ഡ്യൂട്ടി കഴിഞ്ഞ് മടങ്ങുകയായിരുന്ന അസി.മോട്ടോര്‍ വെഹിക്കിള്‍ ഇന്‍സ്പെക്ടറുടെ കാറില്‍ നിന്ന് വിജിലന്‍സ് വിഭാഗം പിടികൂടിയത് കണക്കില്‍പ്പെടാത്ത 50,700 രൂപ. ആലപ്പുഴ സ്വദേശിയായ എ.എം.വി.ഐ ബി.ഷെഫീസാണ് പിടിയിലായത്. പരിശോധനക്കിടെ ബോധരഹിതനായ ഇയാളെ ആശുപത്രിയില്‍ പ്രവേശിപ്പിച്ചു.
ചൊവ്വ, ബുധന്‍, വ്യാഴം ദിവസങ്ങളിലെ ഡ്യൂട്ടി കഴിഞ്ഞ് നാട്ടിലേക്ക് മടങ്ങാനായി നിലമ്പൂര്‍ റെയില്‍വേ സ്റ്റേഷനിലേക്ക് വരുമ്പോഴായിരുന്നു ഷെഫീസിന്റെ കാര്‍ വിജിലന്‍സ് പരിശോധിച്ചത്. കാറിനുള്ളില്‍ ബാഗില്‍ പൊതിഞ്ഞുവെച്ച നിലയിലായിരുന്നു കണക്കില്‍പെടാത്ത പണം. വിജിലന്‍സ് ഡി.വൈ.എസ്.പി എം.ഷെഫീഖിന്റെ നേതൃത്വത്തില്‍ വഴിക്കടവ് മോട്ടോര്‍ വാഹന ചെക്പോസ്റ്റില്‍ വിജിലന്‍സ് പരിശോധന തുടരുകയാണ്. വഴിക്കടവ് അഗ്രി.ഓഫിസര്‍ കെ.നിസാര്‍, വിജിലന്‍സ് എസ്.ഐമാരായ ടി.പി ശ്രീനിവാസന്‍, മോഹന്‍ദാസ്, എ.എസ്.ഐ മുഹമ്മദ് സലിം, സീനിയര്‍ സി.പി.ഒമാരായ പ്രജിത്ത്, വി.പി ശിഹാബ് എന്നിവരാണ് പരിശോധന സംഘത്തിലുള്ളത്.
