താമരശ്ശേരി : ബൈക്കിന് കുറുകെ നായ ചാടിയതിനെ തുടര്‍ന്നുണ്ടായ അപകടത്തില്‍ ഗുരുതരമായി പരിക്കേറ്റയാള്‍ മരിച്ചു. താമരശ്ശേരി കോരങ്ങാട് വട്ടക്കൊരു സ്വദേശി അബ്ദുള്ളക്കോയ(59) ആണ് മരിച്ചത്. ഇന്ന് പുലര്‍ച്ചെ 5.15 ന് പന്നൂര്‍ അങ്ങാടിക്ക് സമീപത്തായിരുന്നു അപകടം. കൂടെ ബൈക്കിലുണ്ടായിരുന്ന കാന്തപുരം സ്വദേശി ജലീല്‍ സഖാഫി നിസാര പരിക്കുകളോടെ രക്ഷപ്പെട്ടു.
റോഡിലേക്ക് തെറിച്ചു വീണ ഇരുവരെയും നാട്ടുകാരാണ് കോഴിക്കോട് മെഡിക്കല്‍ കോളേജ് ആശുപത്രിയില്‍ എത്തിച്ചത്. ചികിത്സയ്ക്കിടെ ഉച്ചയോടെയാണ് അബ്ദുള്ളകോയ മരിച്ചത്. മൃതദേഹം മോര്‍ച്ചറിയിലേക്കു മാറ്റി. മര്‍കസ് റൈഹാന്‍ വാലിയില്‍ ദീര്‍ഘകാലമായി ഹൗസ് കീപ്പിംഗ് സ്റ്റാഫായിരുന്നു അബ്ദുള്ള കോയ.
