ഫറോക്ക് :കണ്ണാട്ടിക്കുളം ചെമ്പകശ്ശേരി പറമ്പ് കോട്ടയിലകത്ത് ഹംസക്കോയയുടെ(54) മരണം കൊലപാതകമെന്നു സ്ഥിരീകരിച്ചു. കഴുത്തിനും തലയ്ക്കും ഏറ്റ മുറിവുകളാണ് മരണ കാരണമെന്നു പോസ്റ്റുമോര്‍ട്ടത്തില്‍ കണ്ടെത്തിയതായി നല്ലളം ഇന്‍സ്പെക്ടര്‍ എം.കെ.സുരേഷ് കുമാര്‍ പറഞ്ഞു. കഴിഞ്ഞ ദിവസം ചെറുവണ്ണൂര്‍ ടിപി റോഡില്‍ കെട്ടിടത്തിന്റെ മുകള്‍ നിലയിലെ വരാന്തയിലാണ് ഹംസക്കോയയെ മരിച്ച നിലയില്‍ കണ്ടെത്തിയത്.
കസ്റ്റഡിയിലെടുത്ത തമിഴ്നാട് കടലൂര്‍ തെന്നാര്‍ക്കാട് കൊടുക്കന്‍ പാളയം സ്വദേശി പ്രകാശനെ(60)അറസ്റ്റ് ചെയ്തു. പ്രതിയെ കോടതി റിമാന്‍ഡ് ചെയ്തു. ബീയര്‍ കുപ്പി കൊണ്ടു തലയ്ക്കും കഴുത്തിനും അടിച്ചതായി ചോദ്യം ചെയ്യലില്‍ പ്രതി മൊഴി നല്‍കി. മദ്യലഹരിയിലായിരുന്ന പ്രതി ഹംസക്കോയയോടു വരാന്തയില്‍നിന്ന് എണീറ്റുപോകാന്‍ പറഞ്ഞപ്പോഴുണ്ടായ വാക്കുതര്‍ക്കമാണ് കൊലപാതകത്തില്‍ കലാശിച്ചതെന്നു പോലീസ് പറഞ്ഞു.
പിടിയിലായ പ്രതി നേരത്തെ ബേപ്പൂരിലും ചെറുവണ്ണൂരിലും കൊലപാതക കേസുകളില്‍ ശിക്ഷ അനുഭവിച്ചിട്ടുണ്ട്. വിരലടയാള വിദഗ്ധരായ എ.വി.ശ്രീജയ, പി.ശ്രീരാജ്, സയന്റിഫിക് ഓഫിസര്‍ വി.ഇസ്ഹാഖ് എന്നിവരുടെ നേതൃത്വത്തില്‍ സംഭവസ്ഥലത്തു ശാസ്ത്രീയ പരിശോധന നടത്തി തെളിവുകള്‍ ശേഖരിച്ചു.
