വാഷിങ്ടണ്‍: ആഗോളതലത്തില്‍ ആറ് കോടി ഡോസ് ആസ്ട്ര സെനിക്ക വാക്സിന് വിതരണം ചെയ്യുമെന്ന് അറിയിച്ച്‌ യു എസ്. വൈറ്റ് ഹൗസ് ഉപദേഷ്ടാവ് ആന്‍ഡി സ്ലാവിറ്റ് ട്വിറ്ററിലൂടെയാണ് ഇക്കാര്യം അറിയിച്ചത്.
ലഭ്യതക്കനുസരിച്ച്‌ വാക്സിന് വിതരണം ചെയ്യുമെന്നാണ് യു.എസ് നിലപാട്. കഴിഞ്ഞ മാര്‍ച്ചില്‍ 40 ലക്ഷത്തോളം കോവിഡ് വാക്സിന് അമേരിക്ക കാനഡക്കും മെക്സിക്കോക്കും നല്‍കിയിരുന്നു. നിലവില്‍ ഇന്ത്യയുള്‍പ്പടെയുള്ള കോവിഡില്‍ ബുദ്ധിമുട്ടുന്ന രാജ്യങ്ങള്‍ക്ക് വാക്സിന് നല്‍കണമെന്ന സമ്മര്‍ദം അമേരിക്കക്ക് മേല്‍ ഉണ്ട്. യു.എസിലെ തന്നെ പല സംഘടനകളും ഇന്ത്യക്ക് വാക്സിനും മറ്റ് സഹായങ്ങളും നല്‍കണമെന്ന ആവശ്യവുമായി രംഗത്തെത്തിയിരുന്നു. അതേസമയം ഇന്ത്യക്ക് സാധ്യമായ എല്ലാ സഹായവും ചെയ്യുമെന്ന് യു.എസ് പ്രസിഡന്റ് ജോ ബൈഡന്‍ കഴിഞ്ഞ ദിവസം വ്യക്തമാക്കിയിരുന്നു. കോവിഡിന്റെ ഒന്നാം തരംഗത്തില്‍ ഇന്ത്യ യു.എസിന് നല്‍കിയ സഹായവും അദ്ദേഹം പരാമര്‍ശിച്ചിരുന്നു.
