തിരുവനന്തപുരം: തദ്ദേശ തെരഞ്ഞെടുപ്പില്‍ കോവിഡ് രോഗികള്‍ക്കും കിടപ്പു രോഗികള്‍ക്കും തപാല്‍ വോട്ട് ചെയ്യുന്നതിനുള്ള ഓര്‍ഡിനന്‍സിന് മന്ത്രിസഭയുടെ അംഗീകാരം. തെരഞ്ഞെടുപ്പ് സമയം ഒരു മണിക്കൂര്‍ കൂട്ടാനും തീരുമാനിച്ചു. നിലവില്‍ ഏഴു മുതല്‍ അഞ്ചു മണിവരെയാണ് വോട്ടെടുപ്പ്. അത് വൈകീട്ട് ആറു മണിവരെയാക്കി.
പഞ്ചായത്ത്‌രാജ്, മുനിസിപ്പാലിറ്റി നിയമങ്ങളില്‍ ഭേദഗതി വരുത്തിക്കൊണ്ടാണ് ഓര്‍ഡിനന്‍സ് ഇറക്കുന്നത്. കോവിഡ് രോഗികള്‍ക്കും ശാരീരിക അവശതയുള്ളവര്‍ക്കും തപാല്‍ വോട്ട് ചെയ്യാം. നിശ്ചിതദിവസത്തിനുള്ളില്‍ തപാല്‍ വോട്ടിന് അപേക്ഷിക്കണമെന്നാണ് വ്യവസ്ഥ. എന്നാല്‍ അതിന് ശേഷം രോഗം സ്ഥിരീകരിക്കുന്നവര്‍ക്ക് ഏങ്ങനെ വോട്ട് ചെയ്യാനാകുമെന്ന് തെരഞ്ഞെടുപ്പ് കമ്മീഷന് തീരുമാനിക്കാമെന്ന നിലപാടാണ് മന്ത്രിയോഗം സ്വീകരിച്ചത്.
കോവിഡ് സാഹചര്യത്തില്‍ സര്‍ക്കാര്‍ ജീവനക്കാരില്‍ നിന്നും പിടിച്ച ശമ്പളം പി.എഫില്‍ ലയിപ്പിക്കാനും മന്ത്രിസഭായോഗം തീരുമാനിച്ചു. ഒരു മാസത്തെ ശമ്പളം അഞ്ചുമാസമായി സര്‍ക്കാര്‍ പിടിച്ചിരുന്നു. ഒമ്പതു ശതമാനം പലിശയോടെ പി.എഫില്‍ ലയിപ്പിക്കുന്ന ഈ തുക ഏപ്രില്‍ മാസത്തില്‍ പിന്‍വലിക്കാം.
സര്‍ക്കാര്‍ ജീവനക്കാര്‍ക്ക് ശമ്പളമില്ലാതെ അവധി നല്‍കുന്നത് അഞ്ചു വര്‍ഷമായി കുറച്ചു.നിലവില്‍ 20 വര്‍ഷമായിരുന്നു ശമ്പളമില്ലാതെ അവധി നല്‍കിയിരുന്നത്. ശ്രീനാരായണ ഓപ്പണ്‍ സര്‍വ്വകലാശാല രൂപീകരണത്തിനുള്ള ഓര്‍ഡിന്‍സിനും മന്ത്രിസഭ അംഗീകാരം നല്‍കി.
