തിരുവനന്തപുരം : കേന്ദ്രത്തിന്റെ കാര്ഷിക നിയമങ്ങള്ക്കെതിരേ പ്രമേയം പാസാക്കാനും കാര്ഷിക പ്രക്ഷോഭത്തിന് ഐക്യദാര്ഢ്യം പ്രഖ്യാപിക്കാനും വിളിച്ച പ്രത്യേക നിയമസഭാ സമ്മേളനത്തിന് ഗവര്ണര് ആരിഫ് മുഹമ്മദ് ഖാന് അനുമതി നിഷേധിച്ചതിനെതിരെ കടുത്ത നിലപാടുകളുമായി പ്രതിപക്ഷം. ഗവര്ണര്ക്കെതിരെ പ്രതിപക്ഷ അംഗങ്ങള് നിയമസഭാ കവാടത്തില് പ്രതിഷേധിക്കും. പ്രതിപക്ഷ അംഗങ്ങള് ഇതിനായി നിയമസഭയിലേക്കെത്തി തുടങ്ങി.
ഇതിനിടെ നിയമസഭയിലെ പ്രതിപക്ഷ നേതാവിന്റെ ഓഫീസില് യുഡിഎഫ് പാര്ലമെന്ററി പാര്ട്ടി യോഗം നടക്കുന്നുണ്ട്. മുന്മുഖ്യമന്ത്രി ഉമ്മന്ചാണ്ടിയടക്കമുള്ള നേതാക്കള് യോഗത്തില് പങ്കെടുക്കുന്നുണ്ട്. കേന്ദ്ര സര്ക്കാരിനെതിരായ നിലപാട് ഉയര്ത്തിക്കാട്ടുന്നതിനൊപ്പം സര്ക്കാരിനെതിരായ ആയുധമാക്കാനുമുള്ള ശ്രമം കൂടിയാണ് പ്രതിപക്ഷം ഇതിനെ കാണുന്നത്. കേന്ദ്ര-സംസ്ഥാന സര്ക്കാരുകള് തമ്മിലുള്ള ഒത്തുതീര്പ്പാണ് ഗവര്ണറുടെ അനുമതി നിഷേധത്തിന് പിന്നിലെന്നാകും പ്രതിപക്ഷത്തിന്റെ പ്രചാരണം.