തിരുവനന്തപുരം : കോഴിക്കോട് ഗസ്റ്റ് ഹൗസില്‍ പ്രവര്‍ത്തിക്കുന്ന നിപാ കണ്‍ട്രോള്‍ റൂം ആരോഗ്യമന്ത്രി വീണാ ജോര്‍ജ് സന്ദർശിച്ച്‌ പ്രവര്‍ത്തനങ്ങള്‍ വിലയിരുത്തി. നിപാ പ്രതിരോധ പ്രവര്‍ത്തനങ്ങളുടെ ഭാഗമായി ആരംഭിച്ച കണ്‍ട്രോള്‍ റൂം സെ‌പ്‌റ്റംബര്‍ അഞ്ച് മുതൽ പ്രവര്‍ത്തന സജ്ജമായി.
എന്‍ക്വയറി കൗണ്ടര്‍, കോണ്ടാക്‌ട് ട്രാക്കിങ് കൗണ്ടര്‍, മെഡിക്കല്‍ കോളേജ് കോണ്ടാക്‌ട് ട്രേസിങ്‌ ടീം എന്നിങ്ങനെ മൂന്ന് കൗണ്ടറുകളാണ്‌ കണ്‍ട്രോള്‍ റൂമിൽ പ്രവര്‍ത്തിക്കുന്നത്. നിപയുമായി ബന്ധപ്പെട്ട എല്ലാ കാര്യങ്ങളും ഏകോപിപ്പിക്കുന്നത് ഈ കണ്‍ട്രോള്‍ റൂമിലൂടെയാണെന്നും മന്ത്രി വ്യക്തമാക്കി.
എന്‍ക്വയറി കൗണ്ടര്‍ 24 മണിക്കൂറും പ്രവര്‍ത്തിക്കുന്ന എന്‍ക്വയറി കൗണ്ടറിൽ മൂന്ന് ഷിഫ്‌റ്റു‌കളിലായി നാല് ജീവനക്കാരാണ്‌ സേവനമനുഷ്‌ഠിക്കുന്നത്. 0495 2382500, 501, 800, 801 എന്നീ നമ്പരുകളിലൂടെ സംശയ നിവാരണത്തിന് ബന്ധപ്പെടാം.
കോണ്ടാക്‌ട് ട്രാക്കിങ് കൗണ്ടര്‍ ഇതുവരെ കണ്ടെത്തിയ സമ്പര്‍ക്ക പട്ടികയിലുള്ള മുഴുവന്‍ പേരുടേയും വിവരങ്ങള്‍ കൗണ്ടറില്‍ നിന്നു ബന്ധപ്പെട്ട് ശേഖരിക്കുന്നു. ആരോഗ്യ സ്ഥിതിയും റെക്കോര്‍ഡ് ചെയ്യുന്നു. രാവിലെ ഒമ്പത്‌ മുതല്‍ ആറ് വരെയാണ് പ്രവര്‍ത്തനം. 8 വോളന്റിയര്‍മാരാണ് ഇവിടെ പ്രവര്‍ത്തിക്കുന്നത്.
മെഡിക്കല്‍ കോളേജ് കോണ്ടാക്‌ട് ട്രേസിങ്‌ ടീം മെഡിക്കല്‍ കോളേജില്‍ സമ്പര്‍ക്ക പട്ടികയിലുള്ളവരുടെ വിശദാംശങ്ങളാണ് രേഖപ്പെടുത്തുന്നത്. നാലുപേരടങ്ങുന്നതാണ് ഈ ടീം.
