കൂത്തുപറമ്പ് : കൂത്തുപറമ്പ്-കൊട്ടിയൂര്‍ റൂട്ടിലെ മാനന്തേരിയില്‍ മണിക്കൂറുകളുടെ വ്യത്യാസത്തിലുണ്ടായ രണ്ട് വാഹനാപകടങ്ങളില്‍ 25 ഓളം പേര്‍ക്ക് പരിക്കേറ്റു. രാവിലെ 10ഓടെ പാകിസ്താന്‍ പീടികയിലായിരുന്നു ആദ്യ അപകടം. കെ.എസ്.ആര്‍.ടി.സി ബസ് മരത്തിലിടിച്ചുണ്ടായ അപകടത്തില്‍ നാല് പേര്‍ക്ക് പരിക്കേറ്റു. വടക്കാഞ്ചേരിയില്‍നിന്ന് കൊട്ടിയൂരിലേക്ക് പോയ ബസ് ആണ് അപകടത്തില്‍പെട്ടത്. സാരമായി പരിക്കേറ്റ ഡ്രൈവര്‍ ഉള്‍പ്പെടെയുള്ളവരെ ആശുപത്രിയില് പ്രവേശിപ്പിച്ചു. മണ്ണന്തറയില്‍ ആണ് രണ്ടാമത്തെ അപകടം.
കെ.എസ്.ആര്‍.ടി.സി ബസും ടോറസ് ലോറിയും കൂട്ടിയിടിച്ചുണ്ടായ അപകടത്തില്‍ 23 പേര്‍ക്കാണ് പരിക്കേറ്റത്. കെ.എസ്.ആര്‍.ടി.സി ഡ്രൈവര്‍ പേരാവൂര്‍ സ്വദേശി ഹരികുമാര്‍, യാത്രക്കാരി ആതിര എന്നിവര്‍ ഉള്‍പ്പെടെ ഏതാനും പേരെ ജില്ല ആശുപത്രിയില് പ്രവേശിപ്പിച്ചു. കൂത്തുപറമ്പ് താലൂക്ക് ആശുപത്രിയിലും ഏതാനും പേര്‍ ചികിത്സയിലുണ്ട്. മാനന്തവാടിയില്‍നിന്ന് കണ്ണൂരിലേക്ക് പോയ കെ.എസ്.ആര്‍.ടി.സി ബസാണ് മണ്ണന്തറയില്‍ അപകടത്തില്‍പെട്ടത്. കൊട്ടിയൂര്‍ ഉത്സവം ആരംഭിച്ചതോടെ സംസ്ഥാനത്തിന്റെ പല ഭാഗങ്ങളില്‍നിന്നുള്ള കെ.എസ്.ആര്‍.ടി.സി ബസുകളാണ് ഇതുവഴി സര്‍വിസ് നടത്തുന്നത്. ചാറ്റല്‍മഴയില്‍ ബസിന്റെ നിയന്ത്രണം വിട്ടതാണ് അപകടത്തിനിടയാക്കിയതെന്ന് നാട്ടുകാര്‍ പറഞ്ഞു. കണ്ണവം പോലീസ് സ്ഥലത്തെത്തി അന്വേഷണം നടത്തി.
