ജനീവ : ലോകത്ത് 110 രാജ്യങ്ങളില് കോവിഡ് കേസുകള് ഉയരുന്നുവെന്ന് ലോകാരോഗ്യ സംഘടന.ഈ മഹാമാരി മാറുകയാണ്, പക്ഷേ അത് അവസാനിച്ചിട്ടില്ല.കേസുകള് റിപ്പോര്ട്ട് ചെയ്യുന്നത് കുറയുന്നതിനാല് ലഭ്യമാകുന്ന ജീനോമിക് സീക്വന്സുകളും കുറവാണ്. ഇതുമൂലം ഒമിക്രോണിനെ ട്രാക്ക് ചെയ്യാനും പുതിയ വകഭേദങ്ങളെ വിശകലനം ചെയ്യാനുമുള്ള സാധ്യതകള് കുറയുകയാണെന്ന് ഡബ്ല്യു.എച്ച്.ഒ ഡയറക്ടര് ജനറല് ടെഡ്രോസ് അദാനോം ഗെബ്രിയേസസ് പറഞ്ഞു.
പലയിടങ്ങളിലും കോവിഡിന്റെ BA.4, BA.5 വകഭേദങ്ങള് കൂടുന്നുണ്ട്. 110 രാജ്യങ്ങളില് കേസുകള് വര്ധിച്ചുകൊണ്ടിരിക്കുകയാണ്. ഇത് ആഗോളതലത്തില് കേസുകള് 20 ശതമാനം വര്ധിക്കുന്നതിനും ലോകാരോഗ്യ സംഘടനയുടെ ആറ് മേഖലകളില് മൂന്ന് എണ്ണത്തിലും മരണങ്ങള് വര്ധിക്കുന്നതിനും ഇടയാക്കിയിട്ടുണ്ട്.