പാറശാല: ടോറസ് ലോറി ഇടിച്ചതിനെ തുടർന്ന് നിയന്ത്രണം വിട്ട മിനിലോറി കടയിലേക്ക് ഇടിച്ചു കയറിയുണ്ടായ അപകടത്തിൽ ഒരാൾ മരിച്ചു. നാലുപേർക്ക് പരിക്കേറ്റു. അപകടത്തിൽ കടയിലുണ്ടായിരുന്ന അതിയന്നൂര് നെട്ടറത്തല വീട്ടില് ഗോപാലന് (82)ആണ് മരിച്ചത്. പുന്നക്കാട് ചന്ദ്രന്, തട്ടുകട ഉടമ രാജശേഖരന്, ആറാലുംമൂട് ചന്ദ്രന്, ആറാലുംമൂടു സെയ്താലി എന്നിവർക്കാണ് പരിക്കേറ്റത്. ആറാലുംമൂട്ടില് കാള ചന്തക്കു സമീപം ഇന്നലെ രാവിലെ എട്ടിനായിരുന്നു അപകടം നടന്നത്.
ദേശീയപാതയില് വഴിമുക്ക് ഭാഗത്തുനിന്ന് വന്ന ടോറസ് മുന്നിൽ പോകുകയായിരുന്ന മിനിലോറിയില് തട്ടിയതോടെ നിയന്ത്രണം വിട്ട ലോറി സമീപത്തെ കടയിലേക്ക് ഇടിച്ചു കയറുകയായിരുന്നു. ഇടത്തോട്ടു തിരിയാന് മിനിലോറി വേഗത കുറച്ചപ്പോള് ടോറസ് തട്ടുകയായിരുന്നുവെന്ന് ദൃക്സാക്ഷികൾ പറഞ്ഞു. ഗുരുതരമായി പരിക്കേറ്റ മിനിലോറി ഡ്രൈവർ റെജിലിനെ മെഡിക്കല് കോളജ് ആശുപത്രിയിൽ പ്രവേശിപ്പിച്ചു. അപകടത്തിൽ പരിക്കേറ്റവര് ജനറൽ ആശുപത്രിയിൽ ചികിത്സതേടി.