തിരുവനന്തപുരം: മുഖ്യമന്ത്രി പിണറായി വിജയന്റേയും സംഘത്തിന്റേയും യുഎഇ സന്ദര്ശനം റദ്ദാക്കിയതു സംബന്ധിച്ച് ദുരൂഹതയെന്ന് കെപിസിസി പ്രസിഡന്റ് കെ സുധാകരന്. ഇക്കാര്യത്തില് ദുരൂഹത നിലനില്ക്കുന്നതിനാല് കേന്ദ്ര- സംസ്ഥാന സര്ക്കാരുകള് വ്യക്തത വരുത്തണമെന്നും കെ സുധാകരന് ആവശ്യപ്പെട്ടു. സാധാരണഗതിയില് കേന്ദ്രം ഇത്തരമൊരു നിലപാട് സ്വീകരിച്ചാല് ശക്തമായി രംഗത്തുവരുന്ന മുഖ്യമന്ത്രി നിശബ്ദനാണ്. മുഖ്യമന്ത്രിയുടെ വിദേശയാത്രയെ മതിയായ കാരണങ്ങളില്ലാതെയാണ് കേന്ദ്രം തടഞ്ഞതെങ്കില് അതു കേരളത്തിനെ അപമാനിക്കുന്നതിനു തുല്യമായതിനാല് കേന്ദ്രവും ഇക്കാര്യത്തില് വ്യക്തത വരുത്തണമെന്നും സുധാകരന് ആവശ്യപ്പെട്ടു.
കേന്ദ്രസര്ക്കാരില് നിന്ന് യാത്രാനുമതി ലഭിക്കാത്തതിനെ തുടര്ന്നാണ് മുഖ്യമന്ത്രിയുടെ സന്ദര്ശനം റദ്ദാക്കിയത്. അബുദാബി സര്ക്കാര് സംഘടിപ്പിക്കുന്ന ഇന്വെസ്റ്റ്മെന്റ് മീറ്റില് പങ്കെടുക്കാനാണ് ക്ഷണമെന്നാണ് സംസ്ഥാന സര്ക്കാരിന്റെ നിലപാട്. എന്നാല് ഇന്ത്യന് എംബസിക്കോ യുഎഇ കോണ്സുലേറ്റിനോ ഇത് സംബന്ധിച്ച അറിയിപ്പ് ലഭിച്ചിട്ടില്ലെന്ന് വിദേശകാര്യ മന്ത്രാലയം അറിയിച്ചു. മുഖ്യമന്ത്രിയ്ക്കും മന്ത്രിമാര്ക്കും ക്ഷണം നല്കണമെന്നുണ്ടെങ്കില് അത് വിദേശകാര്യ മന്ത്രാലയം വഴിയോ കോണ്സുലേറ്റ് വഴിയോ നല്കണമായിരുന്നുവെന്നാണ് വിദേശകാര്യ മന്ത്രാലയത്തിന്റെ നിലപാട്.