ചെന്നൈ: തമിഴ്‌നാട്ടില്‍ സ്‌കൂള്‍ തുറക്കുന്നത് വീണ്ടും നീട്ടിവെച്ചു. കടുത്ത വേനല്‍ച്ചൂടിനെത്തുടര്‍ന്നാണ് തീരുമാനം. ക്ലാസുകള്‍ ജൂണ്‍ 12ന് തുടങ്ങുമെന്ന് വിദ്യാഭ്യാസ മന്ത്രി അന്‍ബില്‍ മഹേഷ് പൊയ്യമൊഴി അറിയിച്ചു. ജൂണ്‍ രണ്ടിന് പുതിയ അധ്യനവര്‍ഷം ആരംഭിക്കേണ്ടിയിരുന്നത് നേരത്തേ ജൂണ്‍ ഏഴിലേക്ക് മാറ്റിയിരുന്നു. 6 മുതല്‍ 12 വരെയുള്ള ക്ലാസുകള്‍ സ്‌കൂളുകള്‍ ജൂണ്‍ 12 മുതലും 1 മുതല്‍ 5 വരെയുള്ള ക്ലാസുകള്‍ ജൂണ്‍ 15 മുതലും തുടങ്ങുമെന്ന് മന്ത്രി അറിയിച്ചു.
ക്ലാസ് മാറ്റിവെയ്ക്കുന്നതു സംബന്ധിച്ച് തമിഴ്‌നാട് മുഖ്യമന്ത്രി എം.കെ സ്റ്റാലിന്‍ വിദ്യാഭ്യാസ മന്ത്രിയുമായും മറ്റ് ഉദ്യോഗസ്ഥരുമായും ചര്‍ച്ച നടത്തിയിരുന്നു. ഇതേത്തുടര്‍ന്നാണ് മന്ത്രിയുടെ അറിയിപ്പ് എത്തിയത്. തമിഴ്‌നാട് അതിശക്തമായ വേനല്‍ച്ചൂടിനാണ് സാക്ഷ്യം വഹിക്കുന്നത്. ഉഷ്ണതരംഗത്തിനും സാധ്യതയുള്ളതിനാലാണ് സ്‌കൂളുകള്‍ തുറക്കുന്നത് ഇനിയും വൈകുന്നത്.
