ന്യൂഡല്‍ഹി : രാജ്യത്ത് കഴിഞ്ഞവര്‍ഷമുണ്ടായ വാഹനാപകടങ്ങളില്‍ ജീവന്‍ നഷ്ടമായവരുടെ എണ്ണം 1.20 ലക്ഷം. ശരാശരി പ്രതിദിനം 328പേര്‍ വിവിധ അപകടങ്ങളില്‍ മരിച്ചതായാണ് കണക്കുകള്‍. മൂന്നുവര്‍ഷത്തിനിടെ 3.92 ലക്ഷം പേര്‍ വിവിധ റോഡപകടങ്ങളില്‍ മരിച്ചതായും നാഷനല്‍ ക്രൈം റെക്കോഡ്സ് ബ്യൂറോ പറയുന്നു.
2019 ല്‍ 1.36 ലക്ഷം പേര്‍ക്കും 2018 ല്‍ 1.35 ലക്ഷംപേര്‍ക്കും റോഡപകടങ്ങള്‍ മൂലം ജീവന്‍ നഷ്ടമായി. വാഹനാപകടങ്ങളുമായി ബന്ധപ്പെട്ട് 2020 ല്‍ 41,196 കേസുകള്‍ രജിസ്റ്റര്‍ ചെയ്തു. 2019 ല്‍ ഇത് 47,504 ആയിരുന്നു. 2018 ല്‍ 47,028 കേസുകളും. മുന്‍വര്‍ഷം പ്രതിദിനം ശരാശരി 112 വാഹനാപകട കേസുകള്‍ രജിസ്റ്റര്‍ ചെയ്തതായും കണക്കുകള്‍ സൂചിപ്പിക്കുന്നു.
പൊതുവഴിയില്‍ അശ്രദ്ധമായി വാഹനമോടിച്ച കേസുകള്‍ 2020 ല്‍ 1.30 ലക്ഷമാണ്. 2019 ല്‍ ഇത് 1.60 ലക്ഷവും 2018 ല്‍ ഇത് 1.66 ലക്ഷവും ആയിരുന്നു. 2022 ല്‍ ട്രെയിന്‍ അപകടവുമായി ബന്ധപ്പെട്ട് 52 പേരാണ് രാജ്യത്ത് മരിച്ചത്. 2019 ല്‍ 55 പേരും 2018 ല്‍ 35 പേരും മരിച്ചു. ചികിത്സപിഴവ് മൂലം 133 പേരാണ് 2020 ല്‍ മരിച്ചത്. 2019 ല്‍ 201പേരും 2018 ല്‍ 218പേരും ചികിത്സ പിഴവ് മൂലം മരിച്ചതായി കണക്കുകള്‍ വ്യക്തമാക്കുനനു.
രാജ്യത്ത് ഉയര്‍ന്നുവരുന്ന വാഹനാപകട മരണ കണക്കുകള്‍ ആശങ്കയുണ്ടാക്കുന്നതാണെന്ന് വിദഗ്ധര്‍ സൂചിപ്പിക്കുന്നു. 2020 ല്‍ കോവിഡ് 19നെ തുടര്‍ന്ന് പ്രഖ്യാപിച്ച ലോക്ഡൗണില്‍ മാര്‍ച്ച്‌ 25, മുതല്‍ മേയ് 31വരെ ഗതാഗതം വളരെ കുറഞ്ഞ നിലയിലായിരുന്നു. എന്നാല്‍ ലോക്ഡൗണിന് ശേഷം വാഹനാപകടത്തിന്‍റെ എണ്ണം കുത്തനെ ഉയരുകയായിരുന്നു.
