ഡല്‍ഹി : ഇന്ത്യയുടെ ഏറ്റവും പുതിയ മിസൈലായ അഗ്നി പ്രൈമിന്റെ പരീക്ഷണം വിജയകരമായി പൂര്‍ത്തിയാക്കിയതായി ഡി.ആര്‍.ഡി.ഒ വ്യക്തമാക്കി. ഒഡീഷയിലെ ചാന്ദിപൂരിലെ വിക്ഷേപണ കേന്ദ്രത്തിലാണ് പരീക്ഷണം നടത്തിയത്. പരീക്ഷണ വിക്ഷേപണത്തില്‍ നിശ്ചയിച്ചുറപ്പിച്ചിരുന്ന എല്ലാ ലക്ഷ്യങ്ങളും മിസൈല്‍ പൂര്‍ത്തീകരിച്ചുവെന്നും അധികൃതര്‍ വ്യക്തമാക്കി.
ഏറ്റവും പുതിയ തലമുറയില്‍പെട്ട ബാലിസ്റ്റിക് മിസൈലായ അഗ്നി പ്രൈമിന് 1000 മുതല്‍ 2000 കിലോമീറ്റര്‍ ദൂരം വരെ സഞ്ചരിക്കാനാകും. ആത്മനിര്‍ഭര്‍ ഭാരതിന്റെ ഭാഗമായി തദ്ദേശീയമായി വികസിപ്പിച്ച മിസൈലിന് അഗ്നി 3 മിസൈലിന്റെ പകുതി മാത്രം ഭാരമാണ് ഉള്ളത്. അഗ്നി പ്രൈം മിസൈലുകള്‍ റോഡില്‍ നിന്നും റെയിലില്‍ നിന്നും വിക്ഷേപിക്കാന്‍ സാധിക്കുന്നതാണ്.
നിര്‍മ്മാണ പ്രത്യേകതകള്‍ കാരണം കൂടുതല്‍ നാള്‍ സൂക്ഷിച്ചു വെയ്ക്കാനും രാജ്യത്തിന്റെ ഏതു ഭാഗത്തേക്കും വളരെ എളുപ്പം കൊണ്ടുപോകാനും സാധിക്കുന്നതാണ് അഗ്നി പ്രൈം മിസൈലുകള്‍. ഇന്ത്യന്‍ മഹാസമുദ്രത്തിലെ ശത്രു രാജ്യങ്ങളുടെ മുന്നേറ്റം ചെറുക്കാനായിരിക്കും അഗ്നി പ്രൈം ഉപയോഗിക്കുക എന്നാണ് ലഭ്യമായ വിവരം.
