വിശാഖപട്ടണം : ആന്ധ്രാപ്രദേശിലെ വിസിയനഗരത്തില്‍ കോവിഡ് പോസിറ്റീവായ മൂന്നുപേരെ ആശുപത്രിയിലെത്തിച്ചത് മാലിന്യങ്ങള്‍ കൊണ്ടുപോകുന്ന ട്രക്കില്‍. ജരാജപുപേട്ട ഗ്രാമത്തില്‍ വെള്ളിയാഴ്ചയാണ് സംഭവം. കോവിഡ് പോസിറ്റീവായ രോഗികളെ പ്രാഥമിക ആരോഗ്യകേന്ദ്രത്തില്‍ നിന്ന് വിദഗ്ധ ചികിത്സക്കായി ആശുപത്രിയിലേക്ക് മാറ്റാന്‍ ഡോക്ടര്‍ റഫര്‍ ചെയ്യുകയായിരുന്നു. തുടര്‍ന്നാണ് ഇവരെ ചവറുകൊണ്ടുപോകുന്ന ട്രക്കില്‍ യാതൊരു സുരക്ഷക്രമീകരണങ്ങളുമില്ലാതെ കൊണ്ടുപോയത്. സംഭവത്തില്‍ ജില്ലാ മെഡിക്കല്‍ ഓഫീസര്‍ അന്വേഷണത്തിന് ഉത്തരവിട്ടിട്ടുണ്ട്.
കൊണ്ട വേലുഗഡ പ്രാഥമിക ആരോഗ്യ കേന്ദ്രത്തില്‍ ചികിത്സക്കെത്തിയ കോവിഡ് രോഗികളെ നെല്ലിമര്‍ല നിംസ് ആശുപത്രിയിലേക്ക് മാറ്റാന്‍ ഡോക്ടര്‍ നിര്‍ദേശിച്ചു. ഡോക്ടര്‍ ആംബുലന്‍സിനായി വിളിച്ചെങ്കിലും രോഗികളുടെ ബന്ധുക്കളിലൊരാള്‍ ഇവരെ ആശുപത്രിയിലെത്തിക്കാമെന്ന് അറിയിക്കുകയായിരുന്നു. തുടര്‍ന്ന് ആശുപത്രി ജീവനക്കാര്‍ ഇവര്‍ക്ക് പി.പി.ഇ കിറ്റ് നല്‍കി പറഞ്ഞയക്കുകയായിരുന്നു. ചവറുവണ്ടി ഓടിക്കുന്നയാള്‍ പി.പി.ഇ കിറ്റ് ധരിച്ചിട്ടുണ്ട്. എന്നാല്‍ ട്രക്കിലിരിക്കുന്ന രോഗികള്‍ കൃത്യമായി മാസ്ക് പോലും ധരിച്ചിട്ടില്ല. സംഭവത്തിന്റെ ദൃശ്യങ്ങള്‍ സോഷ്യല്‍ മീഡയയില്‍ പ്രചരിക്കുന്നുണ്ട്.
കോവിഡ് പ്രോട്ടോകോള്‍ പാലിക്കാതെ രോഗികളെ തുറന്ന വാഹനത്തില്‍ കയറ്റിവിട്ട ഡോക്ടര്‍ക്കെതിരെ അന്വേഷണം നടത്തുമെന്ന് വിസിയനഗരം ജില്ലാ മെഡിക്കല്‍ ഓഫീസര്‍ ഡോ.രമണ കുമാരി അറിയിച്ചു. നിംസ് ആശുപത്രിയിലേക്കും നെല്ലിമര്‍ല പഞ്ചായത്ത് പരിധിക്കുള്ളിലും സോഡിയം ഹൈപ്പോക്ളോറൈറ്റും ബ്ലീച്ചിങ് പൗഡറും പോലുളളവ വിതരണം നടത്തുന്ന ട്രക്കിലാണ് രോഗികളെ കൊണ്ടുപോയതെന്നാണ് പഞ്ചായത്ത് അധികൃതരുടെ വാദം. ട്രക്കിലുണ്ടായിരുന്നവര്‍ കോവിഡ് രോഗികളല്ലെന്നും ആ വാഹനം കോവിഡ് രോഗികളെ കൊണ്ടുപോകാന്‍ ഉപയോഗിച്ചിട്ടില്ലെന്നും കളക്ടറെ അറിയിച്ചതായും പഞ്ചായത്ത് അധികൃതര്‍ വിശദീകരിക്കുന്നു.
