ഡല്‍ഹി: പ്രധാനമന്ത്രി നരേന്ദ്ര മോദിയും ആഭ്യന്തര മന്ത്രി അമിത് ഷായും ഉള്‍പ്പെടെയുള്ള ഭാരതീയ ജനതാ പാര്‍ട്ടിയുടെ (ബിജെപി) ഉന്നത നേതാക്കള്‍ ബുധനാഴ്ച ന്യൂഡല്‍ഹിയില്‍ ഉന്നതതല യോഗം ചേര്‍ന്നു. ഈ വര്‍ഷാവസാനം വരാനിരിക്കുന്ന നിയമസഭാ തിരഞ്ഞെടുപ്പുകള്‍ക്കും ഏറെ പ്രതീക്ഷയോടെ കാത്തിരിക്കുന്ന 2024ലെ ലോക്സഭാ തിരഞ്ഞെടുപ്പിനുമുള്ള ഒരുക്കങ്ങളെ കേന്ദ്രീകരിച്ചായിരുന്നു ചര്‍ച്ചകള്‍ നടന്നത്. സംസ്ഥാന തലത്തിലും ദേശീയ തലത്തിലും സര്‍ക്കാരിലും പാര്‍ട്ടി സംഘടനകളിലും ഉണ്ടായേക്കാവുന്ന മാറ്റങ്ങളെക്കുറിച്ചുള്ള ചര്‍ച്ചകളും നടന്നു. ബിജെപി അധ്യക്ഷന്‍ ജെപി നദ്ദ, ബിജെപി ജനറല്‍ സെക്രട്ടറി (സംഘടന) ബിഎല്‍ സന്തോഷ് എന്നിവരും യോഗത്തില്‍ പങ്കെടുത്തു. വൃത്തങ്ങള്‍ പറയുന്നതനുസരിച്ച്, പ്രധാനമന്ത്രി നരേന്ദ്ര മോദി തന്റെ മന്ത്രിമാര്‍ക്ക് യോഗത്തില്‍ പ്രത്യേക നിര്‍ദ്ദേശങ്ങള്‍ നല്‍കുകയും അതത് മേഖലകളില്‍ സമൂഹത്തിലെ പാവപ്പെട്ടവരുടെയും പിന്നാക്ക വിഭാഗങ്ങളുടെയും ആവശ്യങ്ങള്‍ക്ക് മുന്‍ഗണന നല്‍കേണ്ടതിന്റെ പ്രാധാന്യം ഊന്നിപ്പറയുകയും ചെയ്തു.
വരാനിരിക്കുന്ന തിരഞ്ഞെടുപ്പുകള്‍ പ്രാഥമികമായി ഈ പിന്നാക്ക വിഭാഗങ്ങളുടെ ക്ഷേമത്തിലും താല്‍പ്പര്യങ്ങളിലും ശ്രദ്ധ കേന്ദ്രീകരിക്കും, ദരിദ്രരുടെയും ഇടത്തരക്കാരുടെയും ക്ഷേമത്തിനായി പരിശ്രമിക്കാനും, സര്‍ക്കാര്‍ പദ്ധതികള്‍ ഈ ലക്ഷ്യവുമായി ഒത്തുചേര്‍ക്കാനും പ്രധാനമന്ത്രി തന്റെ മന്ത്രിമാരോട് അഭ്യര്‍ത്ഥിച്ചു. കൂടാതെ, പിന്നാക്ക വിഭാഗങ്ങളുടെ ഉന്നമനത്തിലും അവരുടെ ജീവിതനിലവാരം ഉയര്‍ത്തുന്നതിനുള്ള അവസരങ്ങള്‍ ആരായുന്നതിലും പ്രത്യേക ശ്രദ്ധ കേന്ദ്രീകരിച്ച് അവരുടെ പാര്‍ലമെന്റ് മണ്ഡലങ്ങളില്‍ സജീവമായി ഇടപഴകാന്‍ പ്രധാനമന്ത്രി മോദി മന്ത്രിമാരോട് ഉപദേശിച്ചു. അതത് നിയോജകമണ്ഡലങ്ങളിലെ പിന്നോക്ക-ദുര്‍ബല വിഭാഗങ്ങളുടെ പ്രതിനിധികള്‍ തമ്മില്‍ ചെറിയ തോതിലുള്ള കൂടിക്കാഴ്ചകളിലൂടെയും സെമിനാറുകളിലൂടെയും നേരിട്ടുള്ള ആശയവിനിമയം നടത്താന്‍ പ്രധാനമന്ത്രി ശുപാര്‍ശ ചെയ്തു. ഇടത്തരം, ദരിദ്രര്‍, അടിച്ചമര്‍ത്തപ്പെട്ടവര്‍, പിന്നാക്കം എന്നീ വിഭാഗങ്ങളുടെ പ്രാധാന്യം തിരിച്ചറിഞ്ഞ്, പ്രത്യേകിച്ച് ഒരു തിരഞ്ഞെടുപ്പ് വര്‍ഷത്തില്‍, അവരുടെ ആശങ്കകളും അഭിലാഷങ്ങളും നേരിട്ട് അഭിസംബോധന ചെയ്യുന്ന പദ്ധതികള്‍ ആവിഷ്‌കരിക്കേണ്ടതിന്റെ ആവശ്യകത പ്രധാനമന്ത്രി മോദി യോഗത്തില്‍ ഊന്നിപ്പറഞ്ഞു.
