അഞ്ചല്: റോഡപകടത്തില് മരിച്ച സി.ആര്.പി.എഫ് ജവാന്റെ വീട്ടില്നിന്ന് വെടിയുണ്ടകളും ഒഴിഞ്ഞ കെയ്സും കണ്ടെടുത്തു. 2016ല് മരിച്ച അഗസ്ത്യക്കോട് ആലുവിള വീട്ടില് അമിത്തിന്റെ വീട്ടില് നിന്നാണ് മൂന്ന് വെടിയുണ്ടകളും ഒഴിഞ്ഞ മൂന്ന് കെയ്സുകളും കണ്ടെടുത്തത്. അമിത്തിന്റെ സഹോദരനാണ് വീട്ടില് വെടിയുണ്ടയുള്ള കാര്യം പോലീസിനെ അറിയിച്ചത്. അഞ്ചല് പോലീസും കൊല്ലത്തുനിന്ന് ആയുധ പരിശോധന വിദഗ്ധ സംഘവും വീട്ടിലെത്തി വെടിയുണ്ടകളും കെയ്സും കസ്റ്റഡിയിലെടുത്തു.
സ്വത്ത് സംബന്ധമായ തര്ക്കത്തെത്തുടര്ന്ന് അടച്ചിട്ടിരുന്ന കുടുംബ വീടിന്റെ സിറ്റൗട്ടില് താമസമാക്കിയ അമിത്തിന്റെ ജ്യേഷ്ഠ സഹോദരനും ഭാര്യയും കഴിഞ്ഞദിവസം കതക് തുറന്ന് മേശയും മറ്റും പരിശോധിച്ചപ്പോഴാണ് വെടിയുണ്ടകള് കണ്ടത്. ഇതേത്തുടര്ന്ന് അമിത്തിന്റെ അമ്മയെയും മറ്റൊരു സഹോദരനെയും പുനലൂരിലെ വീട്ടില്നിന്ന് അഞ്ചല് പോലീസ് സ്റ്റേഷനില് വിളിച്ചുവരുത്തി മൊഴി രേഖപ്പെടുത്തി. വെടിയുണ്ടകള് വീട്ടിലുണ്ടെന്ന് അറിയാമായിരുന്നെന്നും ഇതിന്റെ ഗൗരവം അറിയില്ലെന്നും മാതാവും സഹോദരനും മൊഴി നല്കി. നേരത്തേ കുളത്തൂപ്പുഴയിലെ റോഡരികില് 12 വെടിയുണ്ടകള് ഉപേക്ഷിച്ച നിലയില് കണ്ടെത്തിയ സംഭവം അന്വേഷിക്കുന്ന സംഘമാണ് ഇതും അന്വേഷിക്കുന്നത്.