ചെന്നൈ: നടനും മക്കള്‍ നീതി മയ്യം അധ്യക്ഷനുമായ കമല്‍ഹാസനെ യു.പി.എ സഖ്യത്തിലേക്ക് ക്ഷണിച്ച്‌ കോണ്‍ഗ്രസ്. മതേതര നിലപാടുള്ള കമല്‍ഹാസന് കോണ്‍ഗ്രസിന് ഒപ്പം പ്രവര്‍ത്തിക്കാന്‍ കഴിയുമെന്ന് കമല്‍ഹാസനെ യു.പി.എയിലേക്ക് ക്ഷണിച്ചുകൊണ്ട് തമിഴ്‌നാട് കോണ്‍ഗ്രസ് അധ്യക്ഷന്‍ കെ.എസ്. അളഗിരി വ്യക്തമാക്കി. വരുന്ന തെരഞ്ഞെടുപ്പില്‍ ഒറ്റക്ക് നിന്ന് മത്സരിച്ച്‌ വിജയിക്കാന്‍ കമല്‍ഹാസന് കഴിയില്ല, ഒരേ മനസുള്ളവര്‍ ജനങ്ങള്‍ക്കായി ഒരുമിച്ച്‌ നില്‍ക്കണമെന്നും അളഗിരി വ്യക്തമാക്കി.
ഇതോടെ സംസ്ഥാനത്ത് രാഷ്ട്രീയ നീക്കങ്ങള്‍ ചൂട് പിടിക്കുകയാണ്. കമല്‍- രജനീകാന്തുമായി പുതിയ സഖ്യനീക്കങ്ങള്‍ക്ക് ശ്രമിക്കുന്നതായുള്ള റിപ്പോര്‍‌ട്ടുകള്‍ക്കിടെയാണ് കോണ്‍ഗ്രസ് ക്ഷണമെന്നത് ശ്രദ്ധേയമാണ്. തമിഴ്നാട്ടിലെ കോണ്‍ഗ്രസിന്‍റെ താരസാന്നിധ്യമായ ഖുശ്ബു ബി.ജെ.പിയിലേക്ക് ചേക്കേറിയത് പാര്‍ട്ടിക്ക് വലിയ ക്ഷീണമുണ്ടാക്കിയിരുന്നു. പിന്നാലെയാണ് കമല്‍ഹാസനെ യു.പി.എയിലേക്ക് ക്ഷണിച്ചിരിക്കുന്നത്.
