ന്യൂഡല്‍ഹി: കോവിഡ് 19ന്റെ രണ്ടാം തരംഗം രൂക്ഷമായതോടെ വിറങ്ങലിച്ച്‌ രാജ്യം. വിവിധ സംസ്ഥാനങ്ങളില്‍ മരണനിരക്ക് കുത്തനെ ഉയരുകയാണ്. 24 മണിക്കൂറിനിടെ മഹാരാഷ്ട്രയില്‍ മാത്രം 773 പേരും ഡല്‍ഹിയില്‍ 348 പേരും മരിച്ചു.
24 മണിക്കൂറും ശ്മശാനങ്ങള്‍ക്ക് പുറത്ത് വാഹനങ്ങളുടെ നീണ്ട നിര കാണാം. കോവിഡ് സ്ഥിരീകരിക്കുന്നതോടെ രോഗികളുടെ ഓക്സിജന്‍ അളവ് ക്രമാതീതമായി താഴുന്നതോടെയാണ് മിക്ക മരണവും. ഓക്സിജന്‍ ക്ഷാമവും ആശുപത്രികളുടെ അപര്യാപ്തതയും മരണനിരക്ക് ഉയര്‍ത്തുന്നുണ്ട്.
കഴിഞ്ഞദിവസം മഹാരാഷ്ട്രയില്‍ 66,836 പേര്‍ക്കാണ് പുതുതായി രോഗം സ്ഥിരീകരിച്ചത്. 81.81 ശതമാനമാണ് മഹാരാഷ്ട്രയിലെ രോഗമുക്തി നിരക്ക്. മരണനിരക്ക് 1.52 ശതമാനവും. നിലവില്‍ 6,91,851 പേരാണ് ഇവിടെ ചികിത്സയില്‍ കഴിയുന്നത്. 16.53 ശതമാനമാണ് സംസ്ഥാനത്തെ പോസിറ്റിവിറ്റി നിരക്ക്. കഴിഞ്ഞദിവസം പ്രധാനമന്ത്രിയുടെ അധ്യക്ഷതയില്‍ ചേര്‍ന്ന മുഖ്യമന്ത്രിമാരുടെ യോഗത്തില്‍ മഹാരാഷ്ട്ര മുഖ്യമന്ത്രി സംസ്ഥാനത്തേക്ക് കൂടുതല്‍ ഓക്സിജനും പ്രതിരോധ മരുന്നുകളും ആവശ്യപ്പെട്ടിരുന്നു.
ഡല്‍ഹിയിലും സമാന സ്ഥിതിയാണ് നേരിടുന്നത്. ഡല്‍ഹിയില്‍ ഏറ്റവും ഉയര്‍ന്ന പ്രതിദിന മരണനിരക്കാണ് കഴിഞ്ഞദിവസം റിപ്പോര്‍ട്ട് ചെയ്തത്. 24,331 പേര്‍ക്ക് പുതുതായി രോഗം സ്ഥിരീകരിക്കുകയും ചെയ്തു. 32 ശതമാനമാണ് ഡല്‍ഹിയിലെ ടെസ്റ്റ് പോസിറ്റിവിറ്റി നിരക്ക്. 92,000 പേരാണ് ഡല്‍ഹിയില്‍ ചികിത്സയിലുള്ളത്. ഓക്സിജന്‍ ക്ഷാമമാണ് ഡല്‍ഹിയെ ശ്വാസം മുട്ടിക്കുന്നത്.
