ന്യൂഡല്‍ഹി: യു.കെയില്‍ ജനിതകമാറ്റം സംഭവിച്ച കൊറോണ വൈറസ് കണ്ടെത്തിയ സാഹചര്യത്തില്‍ ഇന്ത്യയിലെ കോവിഡ് ചികിത്സ രീതിയില്‍ മാറ്റം വേണ്ടെന്ന് വിദഗ്ധ സംഘം. നിലവിലുള്ള ചികില്‍സ രീതി തന്നെ തുടരണമെന്ന് കോവിഡിനായുള്ള നാഷണല്‍ ടാസ്ക് ഫോഴ്സ് അറിയിച്ചു.
ഐ.സി.എം.ആറിന്‍റെ നേതൃത്വത്തിലാണ് ടാസ്ക് ഫോഴ്സിന്‍റെ യോഗം നടന്നത്. ഡോ.വിനോദ് പോള്‍, നീതി ആയോഗ് അംഗം, ഐ.സി.എം.ആര്‍ പ്രതിനിധി ഡോ.ബല്‍റാം ഭാര്‍ഗവ എന്നിവര്‍ യോഗത്തില്‍ പങ്കെടുത്തിരുന്നു. ജനിതകമാറ്റം സംഭവിച്ച വൈറസ് കണ്ടെത്തുന്നതിന് നിരീക്ഷണം ശക്തമാക്കും. സാമൂഹിക അകലം, വ്യക്തിശുചിത്വം, മാസ്ക്ധരിക്കല്‍ തുടങ്ങിയവ ശീലമാക്കണമെന്നും യോഗത്തില്‍ നിര്‍ദേശമുയര്‍ന്നു.
യു.കെയിലെ ജനിതകമാറ്റം സംഭവിച്ച വൈറസിന്‍റെ സാന്നിധ്യം ഇന്ത്യയില്‍ കണ്ടെത്തിയിരുന്നു. അതിവേഗം പടരുന്നതാണ് പുതിയ വൈറസെന്നാണ് റിപ്പോര്‍ട്ട്.
