തിരുവനന്തപുരം : നാട് മുച്ചൂടെ മുടിപ്പിച്ചു. ജനങ്ങള്‍ ദുരിതക്കയത്തില്‍. സര്‍ക്കാരിന്‍റെ അച്ചടിച്ച മേനിയുമായി വീട് തെണ്ടാനൊരുങ്ങി സിപിഎം. സര്‍ക്കാരിന്‍റെ ക്ഷേമപ്രവര്‍ത്തനങ്ങളും വികസന നേട്ടങ്ങളും ജനങ്ങളിലെത്തിക്കാന്‍ പാര്‍ട്ടി കത്ത് തയാറാക്കി ബ്രാഞ്ച് തലം വരെ എത്തിക്കാനാണ് സംസ്ഥാന കമ്മിറ്റിയുടെ തീരുമാനം. ഇതിനായി ഓരോ മൂന്ന് മാസം കൂടുമ്പോഴും സര്‍ക്കാര്‍ നടത്തിയ വികസന പ്രവര്‍ത്തനങ്ങള്‍ ശേഖരിച്ച് പാര്‍ട്ടി സംസ്ഥാന സെന്ററിനെ അറിയിക്കാന്‍ മുഖ്യമന്ത്രിയുടെ ഓഫീസിനെ ചുമതലപ്പെടുത്തി. ഈ വിവരങ്ങള്‍ ഉള്‍പ്പെടുത്തിയായിരിക്കും പാര്‍ട്ടി കത്ത് തയാറാക്കുക.
സാമ്പത്തിക പ്രതിസന്ധിയെ നേരിട്ടുകൊണ്ടാണ് സര്‍ക്കാരിന്‍റെ പ്രവര്‍ത്തനങ്ങള്‍ മുന്നോട്ടു പോകുന്നതെങ്കിലും ജനങ്ങള്‍ക്ക് നല്‍കിയ വാഗ്ദാനങ്ങള്‍ പാലിച്ചുകൊണ്ട് നല്ല നിലയില്‍ പ്രവര്‍ത്തിക്കുന്നുണ്ടെന്നാണ് സിപിഎമ്മിന്‍റെ വിലയിരുത്തല്‍. എന്നാല്‍ സര്‍ക്കാര്‍ നടത്തുന്ന വികസന പ്രവര്‍ത്തനങ്ങള്‍ ജനങ്ങളില്‍ എത്തിക്കുന്നതില്‍ പോരായ്മകളുണ്ടെന്നും പാര്‍ട്ടി വിലയിരുത്തുന്നു. ഇത് മറികടക്കാന്‍ സര്‍ക്കാര്‍ സംവിധാനങ്ങളും പാര്‍ട്ടി സംവിധാനങ്ങളും കൂടുതല്‍ ഫലപ്രദമാക്കണം. സര്‍ക്കാരിനെതിരായ തെറ്റായ പ്രചാരണങ്ങള്‍ക്ക് അതാത് ഘട്ടത്തില്‍ തന്നെ മറുപടി നല്‍കണമെന്ന നിര്‍ദ്ദേശം കര്‍ശനമായി നടപ്പാക്കണം.
ചെറിയ പ്രചാരണങ്ങള്‍ തുടര്‍ച്ചയായി നടത്തി സര്‍ക്കാരിന്‍റെയും പാര്‍ട്ടിയുടെയും വിശ്വാസ്യത തകര്‍ക്കാനാണ് എതിരാളികള്‍ തുടര്‍ച്ചയായി ശ്രമിക്കുന്നത്. അതുകൊണ്ട് ഓരോ പ്രചരണത്തെയും ഫലപ്രദമായി പ്രതിരോധിക്കാന്‍ കഴിയുന്നവിധം പാര്‍ട്ടി സംഘടന സജ്ജമാകണമെന്നും സംസ്ഥാന കമ്മിറ്റി നിര്‍ദ്ദേശിച്ചു. സര്‍ക്കാരിന്‍റെ വികസന പ്രവര്‍ത്തനങ്ങള്‍ പാര്‍ട്ടിയിലും പുറത്തും എത്തിക്കാനുളള പ്രവര്‍ത്തനം തുടര്‍പരിപാടിയായി ഏറ്റെടുക്കണമെന്നും സംസ്ഥാന കമ്മിറ്റി ആവശ്യപ്പെടുന്നു.
സര്‍ക്കാര്‍ സാമ്പത്തിക പ്രതിസന്ധിയിലാണെന്നും ഒന്നും ചെയ്യാന്‍ പറ്റില്ലായെന്നുമുളള ബോധം പൊതുവില്‍ വളര്‍ന്നു വന്നിട്ടുണ്ടെന്നും സിപിഎം വിലയിരുത്തുന്നു. ഇത് സര്‍ക്കാരില്‍ നിന്ന് ഇനി ഒരുകാര്യവും ലഭിക്കില്ലെന്നും വികസന പ്രവര്‍ത്തനങ്ങള്‍ അസാധ്യമാണെന്നുമുളള ചിന്ത വികസിക്കുന്നതിന് ഇടയാക്കുന്നുണ്ടെന്നും സിപിഎം കാണുന്നു.
ഇത്തരമൊരു സ്ഥിതിവിശേഷം എങ്ങനെ ഒഴിവാക്കാമെന്ന കാര്യം പ്രത്യേകം ശ്രദ്ധിക്കണമെന്നാണ് പാര്‍ട്ടി സര്‍ക്കാരിനോട് നിര്‍ദ്ദേശിക്കുന്നത്. പൊതുവായ ചര്‍ച്ചകളുടെയും തീരുമാനങ്ങളുടെയും അടിസ്ഥാനത്തില്‍ ഇത്തരം പ്രശ്‌നങ്ങളെ മറികടക്കണമെന്നാണ് പാര്‍ട്ടി നിര്‍ദേശിക്കുന്ന പരിഹാരം. കെഎസ്ആര്‍ടിസിയുടെ പ്രതിസന്ധി പരിഹരിക്കുക എന്നത് പ്രധാന ഉത്തരവാദിത്തമാണെന്നും സിപിഎം സംസ്ഥാന കമ്മിറ്റി സര്‍ക്കാരിനെ ഓര്‍മ്മിപ്പിക്കുന്നുണ്ട്. കോര്‍പ്പറേഷനെ പ്രതിസന്ധിയില്‍ നിന്ന് രക്ഷിക്കുന്ന കാര്യത്തില്‍ തുടര്‍ച്ചയായ ഇടപെടല്‍ വേണമെന്നും സംസ്ഥാന കമ്മിറ്റി നിര്‍ദ്ദേശിക്കുന്നുണ്ട്.
പാര്‍ട്ടിയുടെ അടിത്തറയാണ് പരമ്പരാഗത മേഖലയിലെ തൊഴിലാളികള്‍. ആ മേഖലയെ ആധുനിക വല്‍ക്കരിക്കാനും തൊഴിലാളികളുടെ ജീവിതം മെച്ചപ്പെടുത്താനുമുളള തുടര്‍ച്ചയായ ഇടപെടല്‍ കൂടിയേ തീരു. തൊഴില്‍ മേഖലയിലെ പ്രശ്‌നങ്ങളും തൊഴിലാളികള്‍ക്കിടയില്‍ അസംതൃപ്തി രൂപപ്പെടുന്നതിന് ഇടയാക്കിയിട്ടുണ്ട്. ഇക്കാര്യത്തില്‍ സര്‍ക്കാരിന്‍റെ സജീവ ശ്രദ്ധയുണ്ടാകണം എന്നാണ് സംസ്ഥാന കമ്മിറ്റിയുടെ ആവശ്യം. തദ്ദേശസ്ഥാപനങ്ങളുടെ പ്രവര്‍ത്തനങ്ങള്‍ ശരിയായ ദിശയിലാണോയെന്ന് ഉറപ്പുവരുത്താനാകണമെന്നും സിപിഎം നിര്‍ദ്ദേശിക്കുന്നുണ്ട്.
ഇരുപത് ലക്ഷം പേര്‍ക്ക് തൊഴില്‍ നല്‍കുന്ന പ്രവര്‍ത്തന പദ്ധതി സര്‍ക്കാര്‍ ആവിഷ്‌കരിച്ചിട്ടുണ്ട്. ഇതിന്‍റെ ഭാഗമായി ഓരോ പാര്‍ട്ടി ഘടകവും എങ്ങനെ പ്രവര്‍ത്തിക്കണമെന്നത് സംബന്ധിച്ച് വ്യക്തമായ മാര്‍ഗനിര്‍ദ്ദേശങ്ങളും നല്‍കിയിരുന്നു. ഇക്കാര്യത്തില്‍ സ്വീകരിച്ച നിലപാട് പരിശോധനക്ക് വിധേയമാക്കാന്‍ കഴിയണം. സംസ്ഥാന കമ്മിറ്റി നല്‍കിയ നിര്‍ദ്ദേശങ്ങള്‍ നടപ്പിലാക്കപ്പെട്ടിട്ടില്ല എന്നതാണ് അനുഭവം. പാര്‍ട്ടിക്കും സര്‍ക്കാരിനും ഏറെ മതിപ്പുണ്ടാക്കാനും തൊഴില്‍ തേടുന്ന ചെറുപ്പക്കാരുടെ ശ്രമങ്ങള്‍ക്ക് സഹായം നല്‍കാനുതകുന്ന ഈ പദ്ധതിയുടെ കാര്യത്തില്‍ തദ്ദേശ സ്ഥാപനങ്ങളും പാര്‍ട്ടിയുടെ കീഴ് ഘടകങ്ങളും കാണിക്കുന്ന അലംഭാവം തിരുത്തണമെന്നാണ് സംസ്ഥാന കമ്മിറ്റിയുടെ കര്‍ശന നിര്‍ദ്ദേശം.
ന്യുസ് ചാനലില്‍ ബിസിനസ് ഡെവലപ്മെന്റ് മാനേജരുടെ ഒഴിവുകള്‍
Eastindia Broadcasting Pvt. Ltd. ന്റെ ഉടമസ്ഥതയിലുള്ള പ്രമുഖ ഓണ്‍ലൈന്‍ ന്യൂസ് ചാനല്‍ ആയ പത്തനംതിട്ട മീഡിയായില്‍ ബിസിനസ് ഡെവലപ്മെന്റ് മാനേജരുടെ ഒഴിവുകളുണ്ട് . യോഗ്യരായ ഉദ്യോഗാര്‍ത്ഥികളില്‍ നിന്നും അപേക്ഷകള്‍ ക്ഷണിക്കുന്നു. ഏതെങ്കിലും മാധ്യമ സ്ഥാപനത്തിന്റെ പരസ്യ വിഭാഗത്തില്‍ മുന്‍പരിചയം അഭികാമ്യം. പത്തനംതിട്ടയിലെ ഓഫീസ് കേന്ദ്രീകരിച്ചായിരിക്കും ജോലി. 18000 രൂപാ പ്രതിമാസ ശമ്പളവും 5000 രൂപാ യാത്രാ ചെലവും ലഭിക്കും. കൂടാതെ നിശ്ചിത നിരക്കില്‍ കമ്മീഷനും ലഭിക്കും. താല്‍പ്പര്യമുള്ളവര്‍ പാസ്പോര്‍ട്ട് സൈസ് ഫോട്ടോ സഹിതം വിശദമായ ബയോഡാറ്റാ മെയില്‍ ചെയ്യുക. [email protected] കൂടുതല്‍ വിവരങ്ങള്‍ക്ക് 94473 66263, 85471 98263, 0468 2333033 എന്നീ നമ്പരുകളില്‍ ബന്ധപ്പെടാം.
