കൊച്ചി: ക്രൈംബ്രാഞ്ച് കേസിനെതിരായ ഇഡി ഹര്‍ജി തള്ളണമെന്ന് സര്‍ക്കാര്‍ ഹൈക്കോടതിയില്‍. സ്വപ്ന സുരേഷിന്റെ ശബ്ദരേഖയില്‍ അന്വേഷണം ആവശ്യപ്പെട്ടത് ഇഡി തന്നെയാണെന്നും സര്‍ക്കാര്‍ കോടതിയില്‍ പറഞ്ഞു. ഇഡിയുടെ ഹര്‍ജിക്ക് പിന്നില്‍ രഹസ്യ അജണ്ടയുണ്ടെന്നും സംസ്ഥാനത്തെ രാഷ്ട്രീയ നേതാക്കള്‍ക്കെതിരെ ഊഹാപോഹങ്ങളും അഭ്യൂഹങ്ങളും പുറത്തുവിടുന്നത് ഇതിന്റെ ഭാഗമാണെന്നും സര്‍ക്കാര്‍ കോടതിയില്‍ പറഞ്ഞു.
പ്രാഥമിക അന്വേഷണം പൂര്‍ത്തിയായതിന് ശേഷമാണ് ഇഡിക്കെതിരെ കേസെടുത്തത്. മുഖ്യമന്ത്രിക്കെതിരെ മൊഴി നല്‍ക്കാന്‍ നിര്‍ബന്ധിച്ചെന്ന സ്വപ്നയുടെ അധികാരികത പരിശോധിച്ചു. ശബ്ദം തന്റെത് തന്നെയെന്ന് സ്വപ്നയും സ്ഥിരീകരിച്ചുവെന്നും സര്‍ക്കാര്‍ കോടതിയില്‍ പറഞ്ഞു. ഇഡി അന്വേഷണ ഉദ്യോഗസ്ഥനായ പി രാധാകൃഷ്ണന്റ ഹര്‍ജി നിലനില്‍ക്കില്ലെന്നും രാധാകൃഷ്ണന്‍ ഇതുവരെ കേസില്‍ പ്രതിയല്ലെന്നും സര്‍ക്കാര്‍ പറയുന്നു.
