മെറ്റബോളിസം വര്‍ദ്ധിച്ചാല്‍ മാത്രമാണ് നമ്മള്‍ക്ക് ശരീരഭാരം കൃത്യമായി നിയന്ത്രിച്ച് നിര്‍ത്താന്‍ സാധിക്കുക. മെറ്റബോളിസം വര്‍ദ്ധിപ്പിക്കാന്‍ വ്യായാമം മാത്രമല്ല ചില ആഹാരങ്ങള്‍ കഴിക്കുന്നതിലൂടെ നിങ്ങള്‍ക്ക് മെറ്റബോളിസം വര്‍ദ്ധിപ്പിക്കാം. അത്തരത്തിലുള്ള ആഹാരങ്ങള്‍ ഏതെല്ലാമെന്ന് നോക്കാം.
സിട്രസ്സ് പഴങ്ങള്‍
മഞ്ഞുകാലത്ത് സിട്രസ്സ് പഴങ്ങള്‍ കഴിക്കുന്നത് നല്ലതാണ്. ഇത് ശരീരത്തിലേയ്ക്ക് വിറ്റമിന്‍ സി എത്തിക്കുന്നു. വിറ്റമിന്‍ സി ശരീരത്തില്‍ എത്തുന്നത് നമ്മളുടെ രോഗപ്രതിരോധശേഷി വര്‍ദ്ധിപ്പിക്കാന്‍ വളരെയധികം സഹായിക്കുന്നുണ്ട്. അതുപോലെ തന്നെ നമ്മളുടെ മെറ്റബോളിസം വര്‍ദ്ധിപ്പിക്കാനും ഇവ സഹായിക്കുന്നു. ഇവ ശരീരത്തിലെ അമിതമായിട്ടുള്ള കൊഴുപ്പിനെ എരിയിച്ച് കളയുന്നുണ്ട്. അതിനാല്‍ സിട്രസ്സ് പഴങ്ങള്‍ നിങ്ങളുടെ ഡയറ്റിന്റെ ഭാഗമാക്കുന്നത് വളരെ നല്ലതാണ്. പ്രത്യേകിച്ച് ചെറുനാരങ്ങ കഴിക്കാവുന്നതാണ്. അതുപോലെ തന്നെ ഓറഞ്ച്, മുന്തിരി, ബെറീസ് എന്നിവയിലെല്ലാം തന്നെ വിറ്റമിന്‍ സി നല്ലപോലെ അടങ്ങിയിരിക്കുന്നു. അതിനാല്‍ നിങ്ങളുടെ ഡയറ്റില്‍ ഇവ ചേര്‍ക്കാവുന്നതാണ്. സിട്രസ്സ് പഴങ്ങള്‍ കഴിക്കുമ്പോള്‍ ശ്രദ്ധിക്കേണ്ട കുറച്ച് കാര്യങ്ങളുണ്ട്. പ്രത്യേകിച്ച് സിട്രസ്സ് പഴങ്ങള്‍ അമിതമായി കഴിച്ചാല്‍ അത് വയറ്റില്‍ അസിഡിറ്റി പ്രശ്‌നങ്ങള്‍ ഉണ്ടാക്കുന്നതിന് കാരണമാണ്. അതുപോലെ തന്നെ, ചര്‍മ്മം വല്ലാതെവരണ്ട് പോകുന്നതിന് ഇത് കാരണമാകുന്നുണ്ട്. അതിനാല്‍, മിതമായ അളവില്‍ മാത്രം കഴിക്കാന്‍ ശ്രദ്ധിക്കുക.
ശരീരഭാരം കുറയ്ക്കുമ്പോള്‍
മുളക്
ആഹാരത്തില്‍ മുളക് ചേര്‍ത്താല്‍ നിരവധി ഗുണങ്ങളാണ് ഉള്ളത്. ഇത് ശരീരത്തെ നല്ലപോലെ ചൂടാക്കി നിലനിര്‍ത്താനും അതുപോലെ തന്നെ ശരീരത്തില്‍ നിന്നും അമിതമായിട്ടുള്ള കൊഴുപ്പ് എരിയിച്ച് കളയാനും വളരെയധികം സഹായിക്കുന്നു. ഇത് മെറ്റബോളിസം വര്‍ദ്ധിപ്പിക്കാന്‍ സഹായിക്കുന്നതിനാല്‍ ശരീരഭാരവും നിങ്ങള്‍ക്ക് നിയന്ത്രിക്കാന്‍ സാധിക്കുന്നതാണ്. മുളക് മിതമായ അളവില്‍ മാത്രം കഴിക്കുക. അമിതമായി കഴിക്കുന്നത് പലവിധത്തിലുള്ള ആരോഗ്യ പ്രശ്‌നങ്ങളിലേയ്ക്ക് നയിക്കാം. പ്രത്യേകിച്ച് വയറ്റില്‍ എരിച്ചില്‍ അതുപോലെ തന്നെ അള്‍സര്‍ എന്നിങ്ങനെയുള്ള ആരോഗ്യ പ്രശ്‌നങ്ങളിലേയ്ക്ക് ഇത് നയിച്ചെന്ന് വരാം.
കൊഴുപ്പ് കുറഞ്ഞ ആഹാരം
കൊഴുപ്പ് കുറഞ്ഞ ഇറച്ചി വിഭവങ്ങള്‍ നിങ്ങള്‍ ആഹാരത്തില്‍ ചേര്‍ത്താല്‍ നിരവധി ഗുണങ്ങളാണ് ഉള്ളത്. ഇത്തരം ഇറച്ചികളില്‍ പ്രോട്ടീന്‍ നല്ലപോലെ ഉണ്ടായിരിക്കും. പ്രോട്ടീന്‍ ശരീരത്തില്‍ എത്തുന്നത് പേശികളുടെ ആരോഗ്യത്തിന് വളരെ നല്ലതാണ്. അതുപോലെ തന്നെ ഇത് മെറ്റബോളിസം വര്‍ദ്ധിപ്പിക്കുകയും അതിലൂടെ ശരീരഭാരം കുറ്‌യ്ക്കാന്‍ സാധിക്കുന്നതാണ്. ഇതിനായി നിങ്ങള്‍ക്ക് ചിക്കന്‍, മീന്‍ എന്നിവ കഴിക്കാവുന്നതാണ്. ഇറച്ചി വിഭവങ്ങള്‍ പതിവായി അമിതമായി കഴിച്ചാല്‍ ചിലര്‍ക്ക് വയറ്റില്‍ നിന്നും പോകാന്‍ ബുദ്ധിമുട്ട് അനുഭവിക്കുന്നത് കാണാം. ചിലപ്പോള്‍ ഇവ മൂലക്കുരു പോലെയുള്ള അസുഖങ്ങളിലേയ്ക്കും നയിക്കാം. അതിനാല്‍, ഇറച്ചി വിഭവങ്ങള്‍ കഴിക്കുമ്പോള്‍ നല്ലപോലെ ഫൈബര്‍ അടങ്ങിയ ആഹാരങ്ങളും ഒപ്പം കഴിക്കാന്‍ ശ്രദ്ധിക്കണം.
ഓട്‌സ്
ശരീരഭാരം കുറയ്ക്കാന്‍ ശ്രമിക്കുന്ന മിക്കവരും ഒരു നേരത്തെ ആഹാരമായി ഓട്‌സ് കഴിക്കുന്നുണ്ട്. ഓട്‌സില്‍ നിരവധി നാരുകള്‍ അടങ്ങിയിരിക്കുന്നു. ഇവയെല്ലാം തന്നെ ആരോഗ്യത്തിന് നല്ലതാണ്. ഇവ ശരീരഭാരം കുറയ്ക്കാന്‍ വളരെയധികം സഹായിക്കുന്നുണ്ട്. കാരണം ഇതില്‍ നാരുകള്‍ അടങ്ങിയിരിക്കുന്നതിനാല്‍ തന്നെ ഇവ കഴിച്ച് കഴിഞ്ഞാല്‍ വേഗത്തില്‍ തന്നെ വിശപ്പ് കുറയുകയും ദീര്‍ഘനേരത്തേയ്ക്ക് വിശപ്പ് അനുഭവപ്പെടാതിരിക്കുന്നതിനും ഇത് സഹായിക്കുന്നു. അതുപോലെ തന്നെ മെറ്റബോളിസം വര്‍ദ്ധിപ്പിച്ച് ശരീരഭാരം കുറയ്ക്കാനും ഇത് സഹായിക്കുന്നുണ്ട്.
