ന്യൂയോര്‍ക്ക്: യുഎസ് മുന്‍ പ്രസിഡന്‍റ് ഡോണള്‍ഡ് ട്രംപിന്‍റെ ആദ്യ ഭാര്യ ഇവാന അന്തരിച്ചു. ചെക്ക് റിപ്പബ്ലിക്കൻ മോഡലായിരുന്ന ഇവാന സെൽനിക്കോവ 1977-ലാണ് ഡോണൾഡ് ട്രംപിനെ വിവാഹം ചെയ്തത്. ഈ വിവാഹത്തിൽ ഡോണൾഡ് ജൂനിയർ, ഇവാങ്ക, എറിക് എന്നീ മൂന്നു കുട്ടികളുണ്ടായി. 15 വർഷത്തെ ദാമ്പത്യ ജീവിതത്തിനുശേഷം 1992ൽ അവർ വിവാഹമോചനം നേടി. ഇവാനയെ പിരിഞ്ഞതിനുശേഷം മോഡൽ മാര്‍ലാ മേപ്പിള്‍സിനെയാണ് ട്രംപ് വിവാഹം ചെയ്തത്. ന്യൂയോർക്ക് സിറ്റിയിലെ വസതിയിൽ വച്ചായിരുന്നു അന്ത്യമെന്ന് ട്രംപ് സോഷ്യൽ മീഡിയ പ്ലാറ്റ്‌ഫോമായ ട്രൂത്ത് സോഷ്യലിൽ അറിയിച്ചു.
ട്രംപുമായി പിരിഞ്ഞതിനുശേഷം ഇവാന രണ്ടു തവണ കൂടി വിവാഹിതയായി. രണ്ടാം വിവാഹം 1995ല്‍ ഇറ്റാലിയന്‍ വ്യവസായിയായ റിക്കാര്‍ഡോ മസൂച്ചെല്ലിയുമായി നടന്നു. 1997ല്‍ ഇവര്‍ വേര്‍പിരിഞ്ഞു. 2008 ഇറ്റാലിയന്‍ നടന്‍ റോസാനോ റൂബിക്കോണ്ടിയുമായി മൂന്നാം വിവാഹം. ഈ ബന്ധം ഒരു വര്‍ഷമേ നീണ്ടുനിന്നുള്ളൂ.
തന്‍റെ ഓര്‍മ്മക്കുറിപ്പായ “റെയ്സിംഗ് ട്രംപ്’ എന്ന പുസ്തകത്തില്‍ ഇവാന സ്വന്തം അനുഭവങ്ങള്‍ വിവരിച്ചിരുന്നു. ട്രംപുമായുള്ള നീണ്ട കാലത്തെ ദാമ്ബത്യവും അതു തകരാനുണ്ടായ കാരണവും തുടര്‍ന്നുള്ള സംഭവങ്ങളുമായിരുന്നു 2017ല്‍ പുറത്തിറങ്ങിയ പുസ്തകത്തിന്‍റെ ഉള്ളടക്കം. ട്രംപ് പ്രസിഡന്‍റായപ്പോള്‍ ‘ഗുഡ് മോണിംഗ് അമേരിക്ക’ എന്ന ടിവി പരിപാടിയില്‍ ഇവാന നടത്തിയ പ്രസ്താവന വിവാദത്തിന് വഴിവെച്ചിരുന്നു.
