മൂന്നാര്‍ : ദിവസങ്ങള്‍ക്ക് മുന്‍പ് കാണാതായ യുവാവിനെ മരിച്ച നിലയില്‍ കണ്ടെത്തി. വട്ടവട കോവിലൂര്‍ സ്വദേശികളായ രംഗസ്വാമി – മണിയമ്മ ദമ്പതികളുടെ മകന്‍ മുരുകന്‍ (38) ആണ് മരിച്ചത്. യുവാവിനെ കൃഷിയിടത്തില്‍ മരിച്ച നിലയില്‍ കണ്ടെത്തുകയായിരുന്നു. സമീപത്തായി വിഷക്കുപ്പിയും കണ്ടെത്തി. വിഷം കഴിച്ച്‌ മരിച്ചതാണെന്ന് സംശയിക്കുന്നതായി പോലീസ് പറഞ്ഞു. മെയ് ഒന്നിനാണ് ഇയാളെ വീട്ടില്‍ നിന്നും കാണാതായതെന്ന് പരാതി നല്‍കിയിരുന്നു. തുടര്‍ന്ന് ബന്ധുക്കള്‍ അന്വേഷണം നടത്തിയെങ്കിലും കണ്ടെത്തിയില്ല.
മുരുകന്റെ മൊബൈല്‍ ഫോണിന്റെ ടവര്‍ ലൊകേഷന്‍ പരിശോധിച്ചതില്‍ നിന്ന് ഇയാള്‍ ഊര്‍ക്കാടിന് സമീപം ഞാവലാറില്‍ ഉള്ളതായി കണ്ടെത്തി. പിന്നീട് നടത്തിയ തിരച്ചിലിലാണ് ഞാവലാറിലെ കൃഷിയിടത്തില്‍ മരിച്ച നിലയില്‍ കണ്ടെത്തിയത്. ദേവികുളം പോലീസ് ഇന്‍ക്വസ്റ്റ് നടപടികള്‍ പൂര്‍ത്തിയാക്കിയ ശേഷം ഇടുക്കി മെഡികല്‍ കോളജ് ആശുപത്രിയില്‍ പരിശോധന നടത്തിയ മൃതദേഹം ബന്ധുക്കള്‍ക്ക് വിട്ടു നല്‍കി. ഭാര്യ : ഈശ്വരി. മക്കള്‍ : കോകില, കീര്‍ത്തി, കിഷോര്‍.
