കൊല്ലം : ശാസ്താംകോട്ട ഏഴാംമൈലില്‍ ആട്ടോ ഡ്രൈവറെ ആക്രമിച്ച ആറംഗ ഗുണ്ടാസംഘം അറസ്റ്റില്‍. മൈനാഗപ്പള്ളി വേങ്ങ ഒരിച്ചോലില്‍ വീട്ടില്‍ സുഭാഷ് (21), പവിത്രേശ്വരം കൈതക്കോട് മിഥുന്‍ ഭവനത്തില്‍ മിഥുന്‍ (25), കിഴക്കേ കല്ലട കിഴക്കേമുറി ബിനു ഭവനത്തില്‍ ബിനു (28), പവിത്രേശ്വരം ചെറുപൊയ്ക മധു ഭവനത്തില്‍ വിഷ്ണു (24), കിഴക്കേ കല്ലട ദേവീകൃപയില്‍ ജിഷ്ണു (24), ചെറുപൊയ്ക കണ്ടാചരുവിള രാജന്‍ കുഞ്ഞ് (43) എന്നിവരെയാണ് ശൂരനാട് പോലീസ് അറസ്റ്റ് ചെയ്തത്. പോരുവഴി വടക്കേമുറി വീനസ് ഭവനത്തില്‍ വീനസ് കുമാറിനെയാണ് സംഘം ആക്രമിച്ചത്.
തിങ്കളാഴ്ച രാത്രി 7.30 ന് വീനസ് കുമാറിന്റെ ആട്ടോറിക്ഷ ഏഴാംമൈല്‍ ജംഗ്ഷനു സമീപം വെച്ച്‌ ബ്രേക്ക് ഡൗണായി. ഈ സമയം ബൈക്കില്‍ വരികയായിരുന്ന ഗുണ്ടാസംഘം റോഡില്‍ നിന്നും വാഹനം മാറ്റി കൊടുക്കാത്തതിനാല്‍ വീനസിനോടും ആട്ടോയിലെ യാത്രാക്കാരോടും വാക്കുതര്‍ക്കമായി. വീനസിനെ ഗുണ്ടാസംഘം കയ്യില്‍ കരുതിയിരുന്ന വടിവാള്‍കൊണ്ട് വെട്ടുകയും ക്രൂരമായി മര്‍ദ്ദിക്കുകയും ചെയ്തു. ഈ സമയം കണ്ടെയ്ന്‍മെന്റ് സോണുകളിലെ പരിശോധനയ്ക്കായി ശൂരനാട് എസ്.ഐ ശ്രീജിത്തിന്റെ നേതൃത്വത്തിലുള്ള പോലിസ് ജീപ്പ് വരുന്നത് കണ്ട ഗുണ്ടാസംഘം ബൈക്കില്‍ കയറി രക്ഷപെടുകയായിരുന്നു. പ്രതികളെ പിടികൂടാനായി പിന്‍തുടര്‍ന്ന പോലീസ് വാഹനം കണ്ട സംഘത്തിലെ രാജന്‍ കുഞ്ഞ് എന്ന പ്രതി ഓടിച്ചിരുന്ന ബൈക്ക് നിയന്ത്രണം വിട്ട് മറിയുകയും ഇയാളെ കസ്റ്റഡിയിലെടുക്കുകയും ചെയ്തു. തുടര്‍ന്ന് നടത്തിയ ചോദ്യം ചെയ്യലിലാണ് മറ്റുള്ളവരുടെ വിവരങ്ങള്‍ ലഭിച്ചതും അടൂരിലുളള ആള്‍ താമസമില്ലാത്ത വീട്ടില്‍ നിന്നും പിടികൂടിയതും.
അടൂര്‍ സ്വദേശിയായ യുവാവിനെ ആക്രമിക്കാനായിരുന്നു ക്വട്ടേഷന്‍ സംഘം ഏഴാംമൈല്‍ വഴി വന്നതെന്നും മൊഴി നല്‍കി. എഴുകോണ്‍ പോലിസ് സ്റ്റേഷനിലെ എസ്.ഐയെ ആക്രമിച്ച കേസിലും നിരവധി കൊലപാതക കേസുകളിലും പ്രതികളാണിവര്‍. കൊവിഡ് പരിശോധനയ്ക്ക് ശേഷം കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
