ഗോൾഡ്കോസ്റ്റ് : 15 വർഷത്തെ ഇടവേളക്ക് ശേഷം ഓസ്ട്രേലിയയും ഇന്ത്യയും തമ്മിൽ നടക്കുന്ന ടെസ്റ്റിൽ ചരിത്രമെഴുതി സ്മൃതി മന്ദാന. ടെസ്റ്റ് ക്രിക്കറ്റിൽ തന്റെ ആദ്യ സെഞ്ചുറി കണ്ടെത്തിയ താരം ഒരുപിടി റെക്കോഡുകളും സ്വന്തം പേരിൽ എഴുതിച്ചേർത്തു.
ഡേ ആന്റ് നൈറ്റ് മത്സരത്തിൽ (പിങ്ക് ബോൾ ടെസ്റ്റ്) സെഞ്ചുറി നേടുന്ന ആദ്യ ഇന്ത്യൻ വനിതാ താരമായി സ്മൃതി മാറി. ഒപ്പം ഓസ്ട്രേലിയൻ മണ്ണിൽ ഒരു ഇന്ത്യൻ വനിതാ താരം നേടുന്ന ആദ്യ ടെസ്റ്റ് സെഞ്ചുറിയും സ്മൃതി സ്വന്തം പേരിൽ കുറിച്ചു. 216 പന്തിൽ 22 ഫോറിന്റേയും ഒരു സിക്സിന്റേയും സഹായത്തോടെ 127 റൺസാണ് താരം അടിച്ചെടുത്തത്.ഓസ്ട്രേലിയയിൽ ഒരു വിദേശ താരം നേടുന്ന ഏറ്റവും ഉയർന്ന സ്കോറും ഇതു തന്നെയാണ്. 72 വർഷം മുമ്പ് ഇംഗ്ലീഷ് താരം മോളി ഹൈഡ് നേടിയ 124 റൺസിന്റെ റെക്കോഡാണ് സ്മൃതി തിരുത്തിയത്.