ജക്കാര്‍ത്ത : ഇന്തോനേഷ്യന്‍ തലസ്ഥാനമായ ജക്കാര്‍ത്തയില്‍ ഇന്ധന സംഭരണ ഡിപ്പോയിലുണ്ടായ തീപിടിത്തത്തില്‍ മരണം 17 ആയി. 50 പേര്‍ക്ക് പരിക്കേറ്റിട്ടുണ്ട്. മരിച്ചവരില്‍ രണ്ടു പേര്‍ കുട്ടികളാണെന്നാണ് വിവരം. നേരത്തെ 14 പേര്‍ മരിച്ചതായി റിപ്പോര്‍ട്ടുണ്ടായിരുന്നു. ആയിരക്കണക്കിന് ആളുകളെ ഒഴിപ്പിച്ചതായും ഉദ്യോഗസ്ഥര്‍ പറഞ്ഞു. പൊതുമേഖലാ എണ്ണ-വാതക കമ്പനിയായ പെര്‍ട്ടാമിനയുടെ കീഴിലുള്ള പ്ലംപാങ് ഇന്ധന സംഭരണ കേന്ദ്രത്തിലാണ് തീപിടുത്തമുണ്ടായത്. ജനസാന്ദ്രതയേറിയ സ്ഥലത്തിന് സമീപമാണിത്. കനത്തമഴയില്‍ മിന്നലേറ്റ് പൈപ്പ് ലൈന്‍ തകര്‍ന്നതാണ് തീപിടുത്തത്തിന്‍റെ കാരണമെന്ന് പെര്‍ട്ടാമിന ഏരിയ മാനേജര്‍ എക്കോ ക്രിസ്റ്റിയവാന്‍ പറഞ്ഞു.
