ആലുവ : ദേശീയപാതയില്‍ തോക്ക് ചൂണ്ടി കാറും ഡ്രൈവറെയും തട്ടിക്കൊണ്ടുപോയ കേസില്‍ ഒരാള്‍കൂടി അറസ്റ്റില്‍. കായംകുളം പുള്ളിക്കണക്ക് കണ്ടശേരി പടിയിട്ടതില്‍ അന്‍സാബാണ് (മാളു -27) പിടിയിലായത്. രണ്ടുദിവസം മുമ്പ് ഈ കേസുമായി ബന്ധപ്പെട്ട് അരുണ്‍ അജിത് എന്നയാളെ അറസ്റ്റ് ചെയ്തിരുന്നു. മാര്‍ച്ച്‌ 31ന് പുലര്‍ച്ച കമ്പനിപ്പടി ഭാഗത്താണ് കാറിലെത്തിയ പൊന്നാനി സ്വദേശി സജീറിനെ ഏഴംഗ സംഘം തോക്ക് ചൂണ്ടി ഭീഷണിപ്പെടുത്തി വാഹനമുള്‍പ്പെടെ തട്ടിക്കൊണ്ടുപോയത്.
മര്‍ദിച്ചശേഷം ഇയാളെ കളമശ്ശേരിയില്‍ ഇറക്കിവിട്ടു. പിന്നീട് ഫോണും കാറുമായി സംഘം കടന്നുകളയുകയായിരുന്നു. കാറില്‍ 15 ചാക്കോളം ഹാന്‍സ് ആയിരുന്നെന്നാണ് സൂചന. ബംഗളൂരുവില്‍നിന്ന് മൊത്തമായി വാങ്ങി ആലുവയില്‍ വില്‍പനക്ക് എത്തിച്ചപ്പോഴാണ് സംഘം തട്ടിക്കൊണ്ടുപോയത്. ഇരുപതോളം കവര്‍ച്ചക്കേസുകളും വധശ്രമവും ഉള്‍പ്പെടെ 26 കേസുകളിലെ പ്രതിയാണ് ഇയാള്‍.
തിരുവനന്തപുരം സെന്‍ട്രല്‍ ജയിലില്‍നിന്ന് മാര്‍ച്ചിലാണ് പുറത്തിറങ്ങിയത്. 2021ല്‍ കാപ്പ ചുമത്തി നാടുകടത്തിയിരുന്നു. മങ്കടയില്‍ ഒളിവില്‍ കഴിയുകയായിരുന്ന പ്രതിയെ സാഹസികമായാണ് പിടികൂടിയത്. തട്ടിക്കൊണ്ടുപോയ കാര്‍ വര്‍ക്കലയിലെ റിസോര്‍ട്ടില്‍നിന്ന് കണ്ടെടുത്തിരുന്നു. ജില്ല പോലീസ് മേധാവി കെ. കാര്‍ത്തിക്കിന്റെ നേതൃത്വത്തിലെ പ്രത്യേക അന്വേഷണസംഘത്തില്‍ എസ്.എച്ച്‌.ഒ എല്‍. അനില്‍കുമാര്‍, എസ്.ഐ പി.എസ്. ബാബു, സി.പി.ഒമാരായ മാഹിന്‍ ഷാ അബൂബക്കര്‍, മുഹമ്മദ് അമീര്‍, എച്ച്‌. ഹാരിസ്, കെ.എം. മനോജ്, കെ. അയൂബ് എന്നിവരാണുണ്ടായിരുന്നത്. കൂടുതല്‍ പ്രതികള്‍ക്കായി അന്വേഷണം വ്യാപിപ്പിച്ചതായി എസ്.പി പറഞ്ഞു.
