തിരുവനന്തപുരം: എലത്തൂര് ട്രെയിന് തീവെപ്പ് കേസില് വ്യാജപ്രചരണം നടത്തുന്നവര്ക്കെതിരെ കര്ശന നടപടി സ്വീകരിക്കുമെന്ന് കേരള പോലീസിന്റെ മുന്നറിയിപ്പ്. കേസുമായി ബന്ധപ്പെട്ട് ഊര്ജ്ജിതമായ അന്വേഷണം നടന്നുവരികയാണ്. ഈ കേസുമായി ബന്ധപ്പെട്ട് സമൂഹ മാധ്യമങ്ങളിലൂടെ തെറ്റിദ്ധാരണ പരത്തുന്നതും, മതസ്പര്ദ്ധ ജനിപ്പിക്കുന്നതുമായ പോസ്റ്റുകള് പ്രചരിപ്പിക്കപ്പെടുന്നത് ശ്രദ്ധയില്പ്പെട്ടിട്ടുണ്ട്. ഇത്തരത്തിലുള്ള വ്യാജ പ്രചാരണം നടത്തുന്നവര്ക്കെതിരെ കര്ശനമായ നിയമ നടപടികള് സ്വീകരിക്കുമെന്നും പോലീസ് ഔദ്യോഗിക ഫേസ്ബുക്ക് പേജില് കുറിച്ചു.
അതേസമയം ഞായറാഴ്ച രാത്രി ഒന്പത് മണിക്കാണ് ആലപ്പുഴ – കണ്ണൂര് എക്സിക്യൂട്ടീവില് ആക്രമണം നടന്നത്. ആക്രമണത്തില് പൊള്ളലേറ്റ ഏഴ് യാത്രക്കാരാണ് നിലവില് ചികിത്സയില് കഴിയുന്നത്. 35% പൊള്ളലേറ്റ അനില് കുമാറിന്റെ ആരോഗ്യനില മെച്ചപ്പെട്ടെന്നാണ് ആശുപത്രി അധികൃതര് നല്കുന്ന വിവരം. അക്രമത്തില് തുടര്ന്ന് മൂന്നു പേരാണ് മരിച്ചത്. കണ്ണൂര് മട്ടന്നൂര് പാലോട്ടുപള്ളി ബദ്റിയ മന്സിലില് റഹ്മത്ത് (45), റഹ്മത്തിന്റെ സഹോദരിയുടെ മകള് സഹറ, നൗഫിക് എന്നിവരുടെ മൃതദേഹങ്ങള് കോരപ്പുഴ പാലത്തിനും എലത്തൂര് സ്റ്റേഷനും ഇടയിലുള്ള ട്രാക്കില് കണ്ടെത്തുകയായിരുന്നു. ട്രെയിനില് തീ വെച്ചപ്പോള് പരിഭ്രാന്തരായി ഇവര് താഴേക്ക് ചാടിയതാണെന്നാണ് സംശയിക്കുന്നത്.