ന്യൂഡല്ഹി : കെപിസിസിക്ക് വീണ്ടും ജംബോ സമിതി. 90 മുതല് 100 വരെ ഭാരവാഹികള് പട്ടികയില് ഇടംപിടിച്ചു. 30 ജനറല് സെക്രട്ടറിമാരും 50 സെക്രട്ടറിമാരും പട്ടികയില് ഉള്പ്പെടുന്നു. ഒരാള്ക്ക് ഒരു പദവി എന്ന നിര്ദേശം ഒഴിവാക്കി. തൃശൂര് ഡിസിസി അധ്യക്ഷനെയും ഇതോടൊപ്പം പ്രഖ്യാപിക്കും. ആരെയും ഒഴിവാക്കാന് എ, ഐ വിഭാഗങ്ങള് തയാറായിരുന്നില്ല. ജംബോ സമിതിയുടെ പേരില് മാസങ്ങളോളം വൈകിപ്പിച്ച ശേഷമാണ് ഏതാണ്ട് അതേ ജംബോ സമിതിയുടെ പുതിയ രൂപത്തിനു കേരള നേതാക്കള് രൂപം നല്കിയത്. കെപിസിസി പുനഃസംഘടനയില് ഒരാള്ക്ക് ഒരു പദവിയെച്ചൊല്ലി തര്ക്കം രൂക്ഷമായിരുന്നു.
ഹൈക്കമാന്ഡിന്റെ അംഗീകാരത്തിനു നല്കിയ പട്ടികയില് നിരവധി വര്ക്കിംഗ് പ്രസിഡന്റുമാരും ഡസന് കണക്കിനു ജനറല് സെക്രട്ടറിമാരും ജോയിന്റ് സെക്രട്ടറിമാരും ഉണ്ടെന്നാണു സൂചന. ഒരാള്ക്ക് ഒരു പദവി അടക്കമുള്ള കാര്യങ്ങളില് അന്തിമ തീരുമാനം ഹൈക്കമാന്ഡിനു വിട്ടു. എങ്കിലും ഇതു പൂര്ണമായി നടപ്പാക്കാനാകില്ലെന്നു രമേശ് ചെന്നിത്തലയും ഉമ്മന് ചാണ്ടിയും നിലപാടു സ്വീകരിച്ചു.
ഇതേതുടര്ന്നാണു ജംബോ പട്ടിക തയാറാക്കി ഹൈക്കമാന്ഡിന്റെ അംഗീകാരത്തിനായി സമര്പ്പിക്കാന് കെപിസിസി പ്രസിഡന്റ് മുല്ലപ്പള്ളി രാമചന്ദ്രനെ ചുമതലപ്പെടുത്തിയത്. കഴിഞ്ഞ സെപ്റ്റംബറില് നല്കിയ നൂറോളം പേരുടെ ജംബോ പട്ടിക ഹൈക്കമാന്ഡ് അംഗീകരിച്ചിരുന്നില്ല.