തൃശൂർ : കേരളവർമ്മ കോളേജിൽ വിദ്യാർത്ഥി യൂണിയൻ തിരഞ്ഞെടുപ്പ് റീ കൗണ്ടിങ്ങിലൂടെ അട്ടിമറിച്ചുവെന്നാരോപിച്ച് കെഎസ്യു ഹൈക്കോടതിയിലേക്ക്. ആദ്യം വോട്ടെണ്ണിയപ്പോള്‍ കെഎസ്യു സ്ഥാനാര്‍ഥി ശ്രീക്കുട്ടന്‍ ഒരു വോട്ടിന് വിജിച്ചിരുന്നു. 32 വര്‍ഷത്തിന് ശേഷം കേരളവര്‍മ്മയില്‍ ജനറല്‍ സീറ്റ് ലഭിച്ചത് കെഎസ്യു വലിയ രീതിയിൽ ആഘോഷിക്കുന്നതിനിടെയാണ് എസ്എഫ്ഐ റീകൗണ്ടിങ് ആവശ്യപ്പെട്ടത്. തുടർന്ന് അര്‍ധരാത്രി വരെ നീണ്ട നാടകീയ സംഭവങ്ങള്‍ക്കൊടുവില്‍ എസ്എഫ്ഐ സ്ഥാനാര്‍ഥി അനിരുദ്ധന്‍ 11 വോട്ടിന് വിജയിച്ചുവെന്ന് പ്രഖ്യാപിക്കുകയുമായിരുന്നു. എന്നാൽ അട്ടിമറിയുണ്ടായെന്നാണ് കെഎസ്യു ആരോപിക്കുന്നത്. കൊച്ചിൻ ദേവസ്വം ബോർഡ് ചെയർമാനാണ് അട്ടിമറിക്കാൻ നിർദ്ദേശം നൽകിയതെന്നും രാത്രി വൈകിയും റീ കൗണ്ടിങ് നടത്തി എസ്എഫ്ഐയെ വിജയിപ്പിച്ചത് ഉന്നത നിർദ്ദേശ പ്രകാരമാണെന്നും കെഎസ്യു ആരോപിച്ചു. പ്രതിഷേധ സൂചകമായി കൊച്ചിൻ ദേവസ്വം ബോർഡ് ഓഫീസിലേക്ക് കെഎസ്യു മാർച്ച് നടത്തി.
