തിരുവനന്തപുരം : കുടുംബശ്രീ അംഗങ്ങളും ഇനി പോലീസിന്റെ ഭാഗമാകും. സ്ത്രീ കര്‍മ്മസേനയെന്ന പേരില്‍ കുടുംബശ്രീ അംഗങ്ങളുടെ പ്രത്യേക സംഘം കേരള പോലീസില്‍ രൂപീകരിക്കും. തെരഞ്ഞെടുക്കപ്പെടുന്ന കുടുംബശ്രീ അംഗങ്ങള്‍ക്ക് പരിശീലനവും യൂണിഫോമും നല്‍കും. ഡിജിപി അനില്‍കാന്ത് പദ്ധതിയുടെ വിശദ രേഖ തയ്യാറാക്കും. കേരള പോലീസിലെ സേനാംഗങ്ങളായിട്ടല്ല പകരം സ്റ്റുഡന്റ്‌സ് പോലീസ് കേഡറ്റ് പോലെ പ്രത്യേകവിഭാഗമായിട്ടാകും ഇവര്‍ പ്രവര്‍ത്തിക്കുക.
പോലീസ് സ്റ്റേഷനുകളെ കൂടുതല്‍ സ്ത്രീസൗഹൃദമാക്കാനും സ്ത്രീസുരക്ഷ ഉറപ്പാക്കാനുമാണ് പുതിയ പദ്ധതി കേരളാ പോലീസ് വിഭാവനം ചെയ്യുന്നത്. ആഴ്ചയില്‍ മൂന്ന് ദിവസമെങ്കിലും കുടുംബശ്രീ പ്രവര്‍ത്തകര്‍ പോലീസ് സ്റ്റേഷനിലുണ്ടാകണം. നിയമസമിതിയുടെയും ഡിജിപിയുടെയും ശുപാര്‍ശപ്രകാരമാണ് ഇത്തരത്തില്‍ പുതിയ പദ്ധതി പോലീസ് സേന രൂപീകരിച്ചത്.
പദ്ധതിയുടെ വിശദമായ രൂപരേഖ തയ്യാറാക്കാന്‍ ആഭ്യന്തര സെക്രട്ടറി ഡിജിപി അനില്‍ കാന്തിന് നിര്‍ദ്ദേശം നല്‍കിയിട്ടുണ്ട്. സമൂഹത്തിന്റെ അടിത്തട്ട് വരെ സ്വാധീനമുള്ള കുടുംബശ്രീ പ്രവര്‍ത്തകരെ പോലീസിലും ഉപയോഗപ്പെടുത്തുക എന്നതാണ് പദ്ധതിയിലൂടെ ലക്ഷ്യമിടുന്നത്. സമൂഹത്തിന്റെ എല്ലാ കോണിലേക്കും ഇറങ്ങി പ്രവര്‍ത്തിക്കുന്നതിനാലാണ് കുടുംബശ്രീ പ്രവര്‍ത്തകരെത്തന്നെ ഈ പദ്ധതിയുടെ ഭാഗമാക്കാന്‍ തീരുമാനിച്ചത്.
