ചെന്നൈ: കോവിഡ് കാരണം ജനങ്ങള്‍ ദുരിതം നേരിടുന്ന കാലത്ത് 1000 കോടി ചെലവഴിച്ച്‌ പുതിയ പാര്ലമെന്റ് മന്ദിരം നിര്‍മ്മിക്കുന്നതിനെതിരെ തമിഴ് നടനും മക്കള്‍ നീദി മയ്യം പ്രസിഡന്‍റുമായ കമല്‍ഹാസന്‍. ‘കോവിഡ് കാരണം രാജ്യത്തെ പകുതി ജനങ്ങളും ഉപജീവനമാര്‍ഗം നഷ്ടപ്പെട്ട് പട്ടിണിയിലാണ്. ഇതിനിടയില്‍ എന്തിനാണ് 1000 കോടി രൂപയുടെ പുതിയ പാര്ലമെന്റ് മന്ദിരം പണിയുന്നത്? ഇതാണ് കമലഹാസന്റെ ചോദ്യം.
ചൈനയിലെ വന്‍മതില്‍ നിര്‍മ്മിക്കുന്നതിനിടെ ആയിരക്കണക്കിന് ആളുകളാണ് മരിച്ചത്. ജനങ്ങളെ സംരക്ഷിക്കാനാണ് മതില്‍ നിര്‍മ്മിക്കുന്നതെന്നായിരുന്നു അന്ന് ഭരണാധികാരികള്‍ പറഞ്ഞത്. ഇപ്പോള്‍ ആരെ സംരക്ഷിക്കാനാണ് നിങ്ങള്‍ 1000 കോടി രൂപ ചെലവില്‍ പാര്ലമെന്റ് മന്ദിരം നിര്‍മ്മിക്കുന്നത്. ഇതിന് പ്രധാനമന്ത്രി മറുപടി പറയേണ്ടതുണ്ട്’ -കമല്‍ ഹാസന്‍ ട്വീറ്റ് ചെയ്തു. 2021ലെ തമിഴ്‌നാട് നിയമസഭ തെരഞ്ഞെടുപ്പിന്റെ പ്രചാരണം ആരംഭിക്കുന്നതിന് മണിക്കൂറുകള്‍ക്ക് മുന്‍പാണ്‌
കമല്‍ ഹാസന്റെ ട്വീറ്റ്.
കഴിഞ്ഞദിവസമാണ് പുതിയ മന്ദിരത്തിന്റെ ശിലാസ്ഥാപനം പ്രധാനമന്ത്രി നരേന്ദ്ര മോദി നിര്‍വഹിച്ചത്. 64,500 ചതുരശ്രമീറ്റര്‍ വിസ്തീര്‍ണമാണ് കെട്ടിടത്തിനുണ്ടാവുക. രാഷ്ട്രപതി ഭവനില്‍നിന്ന് ഇന്ത്യാ ഗേറ്റ് വരെയുള്ള രാജ്പഥ് വിപുലപ്പെടുത്തി നവീകരിക്കുന്ന ‘സെന്‍ട്രല്‍ വിസ്ത’ സൗന്ദര്യവത്കരണ പദ്ധതിയുടെ ഭാഗമാണ് പുതിയ പാര്ലമെന്റ് മന്ദിരം. വൃത്താകൃതിയിലുള്ള ഇപ്പോഴത്തെ പാര്ലമെന്റ് മന്ദിരത്തിന് സമീപം ത്രികോണാകൃതിയിലാണ് പുതിയ മന്ദിരം ഉയരുക.
ഭരണഘടനയുടെ മാതൃകയിലാണ് ശിലാഫലകം. 2022ല്‍ നിര്‍മാണം പൂര്‍ത്തിയാക്കി സ്വാതന്ത്ര്യത്തിന്റെ 75ാം വാര്‍ഷികത്തില്‍ പുതിയ മന്ദിരത്തില്‍ സമ്മേളനം നടത്താനാണ് ലക്ഷ്യമിടുന്നത്. അതേസമയം കോവിഡ് വ്യാപനം അടക്കമുള്ള സാഹചര്യങ്ങളില്‍ കടുത്ത ധനപ്രതിസന്ധി നേരിടുമ്പോള്‍ ശതകോടികള്‍ ചെലവിട്ട് ആഡംബര നിര്‍മ്മാണം നടത്തുന്നതിനെ പ്രതിപക്ഷം ചോദ്യം ചെയ്തിരുന്നു.
