കോട്ടയം : കോട്ടയം മെഡിക്കല്‍ കോളേജിലെ ഏഴാം വാര്‍ഡ് ഉള്‍പ്പെടുന്ന നേത്ര വിഭാഗം അടച്ചു. ഇവിടെ പരിശോധനയ്ക്ക് എത്തിയ രോഗിക്ക് കോവിഡ് സ്ഥിരീകരിച്ചതിനെ തുടര്‍ന്നാണിത്. ഡോക്ടര്‍മാരും ജീവനക്കാരും നിരീക്ഷണത്തില്‍ പോയി. കഴിഞ്ഞ ദിവസം അസ്ഥിരോഗ വിഭാഗം ഉള്‍പ്പെടുന്ന 11 ആം വാര്‍ഡിലും കോവിഡ് സ്ഥിരീകരിച്ചിരുന്നു. ഡോക്ടര്‍മാര്‍ ഉള്‍പ്പടെ 20 പേരാണ് ഈ വിഭാഗത്തില്‍ നിന്ന് നിരീക്ഷണത്തില്‍ പോയത്.
കോട്ടയത്ത് മൂന്ന് പുതിയ പ്രദേശങ്ങളെ കൂടി കണ്ടെയിന്‍മെന്‍റ് സോണാക്കി. ചങ്ങനാശേരി മുന്‍സിപ്പാലിറ്റി 31,33 വാര്‍ഡുകള്‍, കാഞ്ഞിരപ്പള്ളി പഞ്ചായത്ത് 18 ആം വാര്‍ഡ്, കോട്ടയം മുന്‍സിപ്പാലിറ്റി 46 ആം വാര്‍ഡ് എന്നിവയാണ് പുതിയ കണ്ടെയിന്‍മെന്‍റ് സോണുകള്‍. മണര്‍കാട് പഞ്ചായത്തിലെ എട്ടാം വാര്‍ഡിനെ കണ്ടെയിന്‍മെന്‍റ് സോണില്‍ നിന്ന് ഒഴിവാക്കി. ജില്ലയിലാകെ നിലവില്‍ 19 കണ്ടെയിന്‍മെന്‍റ് സോണുകളുണ്ട്.
