തൃശൂര്‍: മണലൂരില്‍ കോമരം സ്വഭാവദൂഷ്യം ആരോപിച്ചതിനെ തുടര്‍ന്ന് യുവതി ആത്മഹത്യ ചെയ്ത സംഭവത്തില്‍ സംസ്ഥാന വനിതാ കമ്മീഷന്‍ കേസെടുത്തു. കേസുമായി ബന്ധപ്പെട്ട് കോമരമായ പ്രദേശവാസി ശ്രീകാന്ത് നേരത്തെ പോലീസ് അറസ്റ്റിലായിരുന്നു. മാധ്യമവാര്‍ത്തകളുടെ അടിസ്ഥാനത്തില്‍ സംഭവത്തെ കുറിച്ച്‌ വിശദമായി അന്വേഷിച്ച വനിതാ കമ്മീഷന്‍ സ്വമേധയാ നടപടി എടുക്കുകയായിരുന്നു.
മണലൂരില്‍ ക്ഷേത്രത്തില്‍ കോമരം തുള്ളുന്നതിനിടെയാണ് യുവതിക്കെതിരെ ഇയാള്‍ ആരോപണം ഉന്നയിച്ചത്. സുഹൃത്തിന്റെ ആവശ്യ പ്രകാരമായിരുന്നു കോമരമായ ശേഷം ശ്രീകാന്ത് യുവതിക്കെതിരെ ആരോപണം ഉന്നയിച്ചത്. യുവതിക്ക് സ്വഭാവദൂഷ്യമുണ്ടെന്നും ക്ഷേത്രത്തിലെ ദേവിക്ക് മുന്നില്‍ മാപ്പുപറയണമെന്നും ക്ഷേത്രച്ചടങ്ങിനിടെ ഇയാള്‍ വിളിച്ചുപറഞ്ഞു . ഇതില്‍ മനംനൊന്താണ് യുവതി ആത്മഹത്യ ചെയ്തത് . ആത്മഹത്യാപ്രേരണക്കുറ്റം ചുമത്തിയാണ് പ്രതിക്കെതിരെ കേസെടുത്തിരിക്കുന്നത് .
