തിരുവനന്തപുരം : കെ.എം ഷാജിക്കെതിരെ കടുത്ത വിമര്‍ശനവുമായി സ്പീക്കര് പി. ശ്രീരാമകൃഷ്ണന്‍ രംഗത്ത്. മുഖ്യമന്ത്രിയെ കണ്ടാല്‍ സ്പീക്കറുടെ മുട്ടിടിയ്ക്കുമെന്നും വിജിലന്‍സിന് അന്വേഷണ അനുമതി നല്‍കിയത് മുഖ്യമന്ത്രിയുടെ ഓഫീസിന്റെ നിര്‍ദേശപ്രകാരമാണന്നുമുള്ള കെ.എം ഷാജിയുടെ ആരോപണങ്ങളോടാണ് സ്പീക്കര് പി. ശ്രീരാമകൃഷ്ണന്‍ രൂക്ഷ ഭാഷയില്‍ പ്രതികരിച്ചത്. എല്ലില്ലാത്ത നാവു കൊണ്ട് തന്റെ മുട്ടിന്‍കാലിന്റെ ബലം ആരും അളക്കണ്ട എന്ന് സ്പീക്കര് പറഞ്ഞു.
കേസിന്റെ ഗുണദോഷത്തെക്കുറിച്ചോ മികവിനെക്കുറിച്ചോ പരിശോധിക്കേണ്ട ബാധ്യതയോ ഉത്തരവാദിത്വമോ സ്പീക്കര്‍ക്കില്ലെന്ന് അദ്ദേഹം പറഞ്ഞു. ‘നിയമത്തെ നിയമത്തിന്റെ വഴിക്ക് പോകാന്‍ അനുവദിക്കുകയാണ് വേണ്ടത്‌. നാവിന് എല്ലില്ലാ എന്നുള്ളത് കൊണ്ട് എന്തും വിളിച്ചു പറയുന്ന രീതി താന്‍ സ്വീകരിക്കാറില്ല. എല്ലില്ലാത്ത നാവു കൊണ്ട് തന്റെ മുട്ടിന്‍ കാലിന്റെ ബലം ആരും അളക്കണ്ട. താന്‍ ആ സംസ്‌കാരം പഠിച്ചിട്ടില്ലെന്നും’ സ്പീക്കര് ശക്തമായ ഭാഷയില്‍ പ്രതികരിച്ചു. സ്പീക്കറുടെ നടപടികളെ വിവാദങ്ങളിലേക്ക് വലിച്ചിഴക്കുന്നത് ആശാസ്യമല്ല. അത് സഭയോടുള്ള അവഗണനയാണ്. ഇത്തരം സമീപനം ബാലിശവും അപക്വവുമാണെന്നും കെ. എം ഷാജിയുടെ പേരെടുത്തു പറയാതെ സ്പീക്കര് വിമര്‍ശിച്ചു.
