കൊച്ചി: അഞ്ച് ദിവസത്തിനകം പാന്‍ കാര്‍ഡ് ആധാറുമായി ലിങ്ക് ചെയ്തില്ലെങ്കില്‍ പാന്‍ കാര്‍ഡ് ക്യാന്‍സലാകുമെന്ന മുന്നറിയിപ്പുമായി സെന്‍ട്രല്‍ ബോര്ഡ് ഒഫ് ഡയറക്റ്റ് ടാക്സസ്. പാന്‍- ആധാര്‍ രേഖകള്‍ ഈ മാസം 31നകം ലിങ്ക് ചെയ്തില്ലെങ്കില്‍, പാന്‍ കാര്‍ഡ് അസാധുവായി പ്രഖ്യാപിക്കും. മാത്രമല്ല അസാധുവായ കാര്‍ഡ് യാതൊരു പ്രയോജനവുമില്ലാത്ത പ്ലാസ്റ്റിക് കാര്‍ഡ് കഷണം മാത്രമായിരിക്കും. പാന്‍ കാര്‍ഡ് ഉടമകള്‍ സര്‍ക്കാര്‍ നല്‍കുന്ന നിർദേശങ്ങള്‍ പാലിച്ചില്ലെങ്കില്‍, കാര്‍ഡ് ഉടമകളുടെ നികുതിയും ബിസിനസുമായി ബന്ധപ്പെട്ട എല്ലാവിധ പ്രവര്‍ത്തനങ്ങളും തകരാറിലാകുമെന്നും സെന്‍ട്രല്‍ ബോര്ഡ് ഒഫ് ഡയറക്റ്റ് ടാക്സസ് (സിബിഡിടി) സൂചന നല്‍കുന്നുണ്ട്.
മൊത്തം 61 കോടി പാന്‍ കാര്‍ഡുകളില്‍ 48 കോടി കാര്‍ഡുകള്‍ ഇതുവരെ ആധാറുമായി ബന്ധിപ്പിച്ചിട്ടുണ്ടെന്ന് സിബിഡിടി ചെയര്‍പേഴ്സണ്‍ നിതിന്‍ ഗുപ്ത അടുത്തിടെ വ്യക്തമാക്കിയിരുന്നു. എന്നാല്‍ ഇപ്പോഴും കോടിക്കണക്കിന് പാന്‍ കാര്‍ഡുകള്‍ ആധാറുമായി ലിങ്ക് ചെയ്തിട്ടില്ലെന്നും മാര്‍ച്ച് 31നകം നടപടിക്രമങ്ങള്‍ പൂര്‍ത്തിയാകുമെന്ന് പ്രതീക്ഷിക്കുന്നതായും അദ്ദേഹം വ്യക്തമാക്കി. 2023 മാര്‍ച്ച് 31നകം ആധാറുമായി ലിങ്ക് ചെയ്യാത്ത വ്യക്തികളുടെ പാന്‍ ഏപ്രില്‍ മുതല്‍ നിഷ്ക്രിയമായി പ്രഖ്യാപിക്കും. മാത്രമല്ല, നിലവില്‍ പാന്‍ ആധാറുമായി ബന്ധിപ്പിക്കുന്നതിനായി 1000 രൂപ ഫീസ് നല്‍കേണ്ടിവരുമെന്നും സര്‍ക്കാര്‍ വൃത്തങ്ങള്‍ അറിയിച്ചു.
മെസേജിലൂടെ പാന്‍-ആധാര്‍ ലിങ്ക് ചെയ്യുന്ന വിധം
ആധാര്‍ നമ്പര്‍ പാന്‍ നമ്പറുമായി ബന്ധിപ്പിക്കുന്നതിന്, നിങ്ങളുടെ രജിസ്റ്റര്‍ ചെയ്ത മൊബൈല് നമ്പറില്‍ നിന്ന് 567678 അല്ലെങ്കില്‍ 56161 എന്ന നമ്പറിലേക്ക്
ഒരു എസ്എംഎസ് അയയ്ക്കണം. മെസേജ് അയയ്ക്കുന്നതിനുള്ള ഫോര്മാറ്റ് ഇപ്രകാരമാണ്. UIDPAN <12 അക്ക ആധാര്‍ കാര്‍ഡ്> <10 അക്ക പാന്‍> എന്നിങ്ങനെ ടൈപ്പ് ചെയ്ത് 567678 അല്ലെങ്കില്‍ 56161 എന്ന നമ്പറിലേക്ക് അയയ്ക്കുക. ആധാറിലും പാനിലും നികുതിദായകരുടെ പേരും ജനനത്തീയതിയും ഒന്നുതന്നെയാണെന്ന് കണ്ടെത്തിയാല്‍, പാന്‍ ആധാര്‍ കാര്‍ഡുകള്‍ അത് ലിങ്ക് ചെയ്യപ്പെടും.
പാന്‍-ആധാര്‍ ലിങ്ക് ചെയ്തോയെന്ന് പരിശോധിക്കാൻ
ആദ്യം ആദായനികുതി വകുപ്പിന്‍റെ www.incometaxindiaefiling.gov.in എന്ന ഇ-ഫയലിങ് വെബ്സൈറ്റ് സന്ദര്‍ശിക്കുക. മുകളിലുള്ള ക്വിക് ലിങ്ക് ഓപ്ഷന്‍ ലഭ്യമാകും. താഴെയുള്ള “ലിങ്ക് ആധാര്‍ സ്റ്റാറ്റസ്’ എന്ന ഓപ്ഷനില്‍ ക്ലിക്ക് ചെയ്യുക. പാന്‍, ആധാര്‍ എന്നിവയുമായി ബന്ധപ്പെട്ട വിവരങ്ങള്‍ നല്‍കുക. തുടര്‍ന്ന് “ലിങ്ക് ആധാര്‍ സ്റ്റാറ്റസ് കാണുക’ എന്നതില്‍ ക്ലിക്ക് ചെയ്യുക. നിങ്ങളുടെ ആധാറും പാനും ലിങ്ക് ചെയ്തിട്ടില്ലെങ്കില്‍, സ്ക്രീനിലെ പാന്‍ ആധാറുമായി ലിങ്ക് ചെയ്തിട്ടില്ല. ആധാറുമായി “ലിങ്ക് ചെയ്യുക’ എന്ന ലിങ്കില്‍ ക്ലിക്ക് ചെയ്യുക. കാര്‍ഡുകള്‍ ലിങ്ക് ചെയ്താല്‍, നിങ്ങളുടെ ആധാര്‍ പാന്‍കാര്‍ഡുമായി ലിങ്ക് ചെയ്തിരിക്കുന്നു എന്ന് കാണിക്കും.
