തിരുവനന്തപുരം : തീപിടുത്തമുണ്ടായ സെക്രട്ടറിയറ്റിലെ പ്രോട്ടോകോള്‍ ഓഫീസിലെ സിസി ടി വി ദൃശ്യങ്ങള്‍ ഇന്ന് പരിശോധിക്കും. തീപിടുത്തത്തിന് പിന്നില്‍ എന്തെങ്കിലും അട്ടിമറിയുണ്ടോയെന്നും ഇതിന് സഹായകരമായ എന്തെങ്കിലും ദൃശ്യങ്ങളുണ്ടോയെന്നും തിരിച്ചറിയുന്നതിനാണ് വിദഗ്ദ സംഘം പരിശോധന നടത്തുക.
പ്രോട്ടോകോള്‍ ഓഫീസിനകത്ത് സിസി ടി വി ഇല്ലെങ്കിലും സമീപത്തെ സി സി ടിവികളാണ് പരിശോധിക്കുക.
അതിനിടെ തീപിടുത്തത്തിന് കാരണം ഫാന്‍ ചൂടായി ഉരുകിയതാണെന്നും ഇത് ഷോര്‍ട്ട് സര്‍ക്യൂട്ടില്‍ എത്തുകയായിരുന്നെന്നും ചൂണ്ടിക്കാട്ടി അഗ്‌നിശമന സേന സര്‍ക്കാരിന് റിപ്പോര്‍ട്ട് നല്‍കി. ദുരന്ത നിവാരണ അതോറിറ്റി കമ്മിഷണര്‍ എ.കൗശികന്റെ നേതൃത്വത്തില്‍ പൊളിറ്റിക്കല്‍ ഡിപ്പാര്‍ട്ട്‌മെന്റിലെ ഫയലുകളുടെ കണക്കെടുപ്പ് തുടരുകയാണ്. മുഴുവന്‍ ഫയലുകളും പരിശോധിച്ച്‌ സ്‌കാന്‍ ചെയ്ത് സൂക്ഷിക്കും. ഏതൊക്കെ ഫയലുകളാണ് കത്തിയതെന്ന് ഇതിന് ശേഷമേ വ്യക്തമാകൂ.
