കൊച്ചി : സ്‌റ്റേറ്റ് ബാങ്ക് ഓഫ് ഇന്ത്യ (എസ്.ബി.ഐ.)യുടെ എ.ടി.എമ്മുകളില്‍നിന്ന് ഒറ്റത്തവണ പിന്‍ (ഒ.ടി.പി.) ഉപയോഗിച്ച് പണം പിന്‍വലിക്കുന്നതിനുള്ള സമയപരിധി നീട്ടി. ഇനി 24 മണിക്കൂറും ഈ സേവനം ലഭ്യമായിരിക്കും. സെപ്റ്റംബര്‍ 18 മുതലാണ് ഈ സേവനം ലഭ്യമാകുക. 2020 ജനുവരി ഒന്നുമുതലാണ് ഒ.ടി.പി. അധിഷ്ഠിത പണം പിന്‍വലിക്കല്‍ സംവിധാനം എസ്.ബി.ഐ. നടപ്പാക്കിയത്.
10,000 രൂപയ്ക്ക് മുകളില്‍ ഇനി ഇത്തരത്തില്‍ പിന്‍വലിക്കാനാകും. നേരത്തെ വൈകിട്ട് എട്ടു മുതല്‍ രാവിലെ എട്ടു വരെ ആയിരുന്നു ഈ സേവനം ലഭിച്ചിരുന്നത്. ഇതിനായി ഇടപാടുകാര്‍ മൊബൈല്‍ നമ്പര്‍ അപ്‌ഡേറ്റ് ചെയ്യേണ്ടതുണ്ട്.
ഉപഭോക്താവിന് പണം പിന്‍വലിക്കുന്നതിന് മുന്‍പായി മൊബൈലിലേക്ക് ഒരു ഒടിപി ലഭിക്കും. ഈ ഒടിപി ഒരു തവണ മാത്രമേ ഉപയോഗിക്കാന്‍ കഴിയുകയുള്ളൂ. അനധികൃത ഇടപാടുകളില്‍നിന്നും തട്ടിപ്പുകളില്‍ നിന്നും ഉപഭോക്താക്കളെ സംരക്ഷിക്കുന്നതിനുള്ള നടപടിയുടെ ഭാഗമായാണ് എസ്.ബി.ഐ ഇത്തരത്തില്‍ ഒരു സംവിധാനം തയ്യാറാക്കിയത്.
