കല്ല്യാൺ ജ്വല്ലേഴ്സിലെ വൻകിട നിക്ഷേപകരായ വാർബർഗ് പിൻകസ് കല്യാൺ ജ്വല്ലേഴ്സിൻെറ 6.2 ശതമാനം ഓഹരികൾ വിറ്റഴിച്ചു. നോമുറ ഇന്ത്യ ഫണ്ട്, ഫ്രാങ്ക്ലിൻ ടെമ്പിൾടൺ എന്നീ വൻകിട സ്ഥാപനങ്ങൾ ഉൾപ്പെടെ ഓഹരികൾ വാങ്ങി. 250 കോടി രൂപയുടെ ഓഹരികൾ നോമുറ ഫണ്ട് വാങ്ങിയപ്പോൾ 200 കോടി രൂപയുടെ ഓഹരികൾ ആണ് ഫ്രാങ്ക്ലിൻ ടെമ്പിൾടൺ വാങ്ങുന്നത്. വാർബർഗ് പിൻകസ് കമ്പനിയുടെ 2.5 ശതമാനം ഓഹരികൾ മാർച്ചിൽ വിറ്റഴിച്ചിരുന്നു . മാർച്ച് അവസാനത്തോടെ 23.8 ശതമാനം ഓഹരികൾ ആണ് കൈവശം വച്ചിരുന്നത്. ഇന്നത്തെ വിൽപ്പനയോടെ കല്ല്യൺ ജ്വല്ലേഴ്സിലെ കമ്പനിയുടെ ഓഹരി പങ്കാളിത്തം 17.6 ശതമാനമായി.
ഇന്ന് കല്യാൺ ജ്വല്ലേഴ്സിൻെറ ഓഹരികൾ കുതിച്ചുയർന്ന് ഏറ്റവും ഉയർന്ന നിരക്കിലെത്തിയിരുന്നു. ഓഹരിയുടെ ട്രേഡിങ് വോളിയം 4.73 മടങ്ങ് വർദ്ധിച്ചു. കേരളത്തിൽ തൃശൂർ ആസ്ഥാനമായി പ്രവർത്തിക്കുന്ന കല്യാണ് ജ്വല്ലേഴ്സ് ഇന്ത്യയിലെയും മിഡിൽ ഈസ്റ്റിലെയും പ്രമുഖ ജ്വല്ലറി റീട്ടെയിലറാണ്. മൂന്ന് പതിറ്റാണ്ടിലേറെ അനുഭവസമ്പത്തുള്ള, കമ്പനി ഗുണനിലവാരത്തിലും നൂതനമായ ഡിസൈനുകൾ പുറത്തിറക്കുന്നതിലുമൊക്കെ മുൻനിരയിൽ തന്നെയുണ്ട്. 611,000 ചതുരശ്ര അടി വിസ്തീർണ്ണമുള്ള റീട്ടെയിൽ ഏരിയയുള്ള കമ്പനി ഇന്ത്യയിലും മിഡിൽ ഈസ്റ്റിലുമായി 182 ഷോറൂമുകൾ നടത്തുന്നു. കൂടുതൽ ബിസിനസ് വിപുലീകരണത്തിനും നിക്ഷേപങ്ങൾക്കും പദ്ധതിയുണ്ട്. കല്യാൺ ജൂവലേഴ്സ് 2023 സാമ്പത്തിക വർഷത്തിൽ മികച്ച സാമ്പത്തിക പ്രകടനം കാഴ്ച വച്ചിരുന്നു.
വിൽപനയിൽ 30 ശതമാനം വളർച്ചയാണ് കൈവരിച്ചത്. മൊത്തം വിൽപ്പന 14,071.4 കോടി രൂപയാണ്. നികുതിക്ക് മുമ്പുള്ള ലാഭം 37 ശതമാനം വർധിച്ച് 1,114 കോടി രൂപയായി, മുൻ സാമ്പത്തിക വർഷത്തെ അപേക്ഷിച്ച് നികുതിക്ക് ശേഷമുള്ള ലാഭം 93 ശതമാനം ഉയർന്ന് 431.9 കോടി രൂപയായി. കഴിഞ്ഞ ഒരു വർഷത്തിനിടയിൽ 118 ശതമാനം ആദായമാണ് കമ്പനി നേടിയത്. 2021 ഏപ്രിലിൽ ലിസ്റ്റ് ചെയ്ത തീയതി മുതൽ 68 ശതമാനം റിട്ടേൺ നൽകാൻ കമ്പനിക്ക് കഴിഞ്ഞു. കമ്പനി 12 ശതമാനം വിൽപ്പന വളർച്ച നേടി.
