മല്ലപ്പള്ളി: മല്ലപ്പള്ളിയില്‍ മോഷണം വ്യാപകമാകുന്നു. കഴിഞ്ഞ ദിവസം ചെങ്ങരൂര്‍ സര്‍വിസ് സഹകരണ ബാങ്കിന്‍റെ ഹെഡ് ഓഫിസിലും ബ്രാഞ്ചിലും മോഷണശ്രമം നടന്നു.വെളിയിലെ അഞ്ച് ഷട്ടറുകളുടെ പൂട്ട് പൊളിച്ച്‌ അകത്തുകടന്ന മോഷ്ടാക്കള്‍ ഗ്യാസ് കട്ടര്‍ ഉപയോഗിച്ച്‌ ലോക്കര്‍ പൊളിക്കാന്‍ ശ്രമം നടത്തിയെങ്കിലും പരാജയപ്പെട്ടു.
അലമാരയില്‍ സൂക്ഷിച്ചിരുന്ന ഫയലുകള്‍ എല്ലാം വാരിവലിച്ചിട്ട നിലയിലാണ്. അലമാരയിലെ നാണയങ്ങള്‍ മാത്രമാണ് അപഹരിക്കാന്‍ കഴിഞ്ഞത്.രാവിലെ ജീവനക്കാര്‍ എത്തിയപ്പോഴാണ് മോഷണശ്രമം നടന്ന വിവരം അറിയുന്നത്. പത്തനംതിട്ടയില്‍നിന്ന് വിരലടയാള വിദഗ്ധരും ഡോഗ് സ്ക്വാഡും സ്ഥലത്തെത്തി പരിശോധന നടത്തി.
മണം പിടിച്ച നായ് സമീപത്തെ സെന്‍റ് ജോര്‍ജ് മലങ്കര കത്തോലിക്ക പള്ളിയുടെ സമീപം വരെയെത്തി. പള്ളിയിലും കാത്തലിക് സിറിയന്‍ ബാങ്കിലും സ്ഥാപിച്ചിരുന്ന കാമറകള്‍ പ്രവര്‍ത്തനരഹിതമായിരുന്നു. തിരുവല്ല ഡിവൈ.എസ്.പി ടി. രാജപ്പന്‍റെ നേതൃത്വത്തിലുള്ള സംഘം സ്ഥലത്തെത്തി അന്വേഷണം ആരംഭിച്ചു. കഴിഞ്ഞ ദിവസങ്ങളില്‍ പരിസര പ്രദേശങ്ങളില്‍ നിരവധി മോഷണവും മോഷണശ്രമവും നടന്നതായി നാട്ടുകാര്‍ പറയുന്നു. ബൈക്കിലെത്തി സ്ത്രീകളുടെ മാലപൊട്ടിച്ച്‌ കടന്നുകളയുന്ന സംഘങ്ങളുമുണ്ട്.
കുന്നന്താനം നടയ്ക്കലില്‍ ഇരുചക്ര വാഹനത്തിലെത്തിയ സംഘം ഫോണ്‍ വിളിക്കാന്‍ മൊബൈല്‍ ആവശ്യപ്പെട്ടിട്ട് ഇതര സംസ്ഥാന തൊഴിലാളിയുടെ മൊബൈല്‍ ഫോണുമായി കടന്നുകളഞ്ഞു. ആരാധനാലയങ്ങളുടെ കാണിക്ക വഞ്ചികള്‍ കുത്തിത്തുറന്ന് പണം അപഹരിക്കുന്നതും പതിവാണ്.
