കൊല്‍ക്കത്ത: പശ്ചിമ ബംഗാളില്‍ മമത ബാനര്‍ജി സര്‍ക്കാറിന് വീണ്ടും തിരിച്ചടി. രണ്ടു നേതാക്കള്‍ പാര്‍ട്ടി വിട്ടതിനു പിന്നാലെ മറ്റൊരു എം.എല്‍.എ കൂടി രാജിവെച്ചു. തൃണമൂല്‍ എം.എല്‍.എ ശില്‍ബദ്ര ദത്തയാണ് രാജിവെച്ചത്. രണ്ടുദിവസത്തിനുള്ളില്‍ പാര്‍ട്ടിയില്‍ നിന്നും മൂന്നാമത്തെ രാജിയാണിത്.
തെരഞ്ഞെടുപ്പിന് കേവലം അഞ്ചുമാസം മാത്രം ബാക്കിനില്‍ക്കെയാണ് തൃണമൂലില്‍നിന്നുള്ള നേതാക്കളുടെ കൊഴിഞ്ഞുപോക്ക്. കഴിഞ്ഞദിവസം സുവേന്ദു അധികാരിയും ജിതേന്ദ്ര തിവാരിയും രാജിക്കത്ത് കൈമാറിയിരുന്നു. മുതിര്‍ന്ന ബി.ജെ.പി നേതാവും കേന്ദ്ര ആഭ്യന്തര മന്ത്രിയുമായ അമിത് ഷായുടെ ബംഗാള്‍ സന്ദര്‍ശനത്തിന് ശേഷമാണ് തൃണമൂല്‍ കോണ്‍ഗ്രസിലെ ഈ വിള്ളല്‍. അമിത് ഷായുടെ നീക്കങ്ങളിലൂടെ പലരും തൃണമൂല്‍വിട്ട് ബി.ജെ.പിയിലെത്തുമെന്നാണ് സൂചന. 2016 ലെ നിയമസഭ തെരഞ്ഞെടുപ്പില്‍ തൃണമൂലിന്റെ വിജയത്തിന് മുഖ്യപങ്കുവഹിച്ച വ്യക്തിയായിരുന്നു സുവേന്ദു അധികാരി. സുവേന്ദു അധികാരി പാര്‍ട്ടിയിലേക്ക് ചേക്കേറിയാല്‍ വലിയ നേട്ടമാകും ബി.ജെ.പിക്ക്.
സംസ്ഥാനത്തിന്റെ പടിഞ്ഞാറന്‍ ഭാഗങ്ങളില്‍ സുവേന്ദുവിന് വന്‍ പിടിപാടുണ്ട്. പടിഞ്ഞാറന്‍ ബംഗാളിലെ ഏകദേശം 50ഓളം പ്രാദേശിക നേതാക്കള്‍ തനിക്കൊപ്പമുണ്ടെന്ന് സുവേന്ദു അധികാരി വ്യക്തമാക്കിയിരുന്നു. കഴിഞ്ഞമാസം മമത ബാനര്‍ജി മന്ത്രിസഭയില്‍നിന്ന് സുവേന്ദു രാജിവെച്ചിരുന്നു. അതിന് പിന്നാലെയാണ് പാര്‍ട്ടിയില്‍നിന്നുള്ള രാജിയും.
