വടശ്ശേരിക്കര : ആദിവാസി യുവാവിന് മര്‍ദനമേറ്റ സംഭവത്തില്‍ നടപടിയെടുക്കണമെങ്കില്‍ ജാതി സര്‍ട്ടിഫിക്കറ്റ് ഹാജരാക്കണമെന്ന പോലീസ് നിലപാട് വിവാദത്തില്‍. വാറ്റുസംഘത്തെ ഒറ്റുകൊടുത്തെന്ന് ആരോപിച്ച്‌ ശബരിമല വനത്തിലെ ളാഹ മഞ്ഞത്തോട്ടില്‍ താമസിക്കുന്ന ആദിവാസി യുവാവ് അജയനെ മൂവര്‍ സംഘം ആക്രമിച്ച കേസിലാണ് തുടര്‍ നടപടിക്ക് ജാതി തെളിയിക്കുന്ന സര്‍ട്ടിഫിക്കറ്റ് നല്‍കണമെന്ന വിചിത്ര ആവശ്യം പെരുനാട് സി.ഐ ഉന്നയിച്ചിരിക്കുന്നത്.
കഴിഞ്ഞ ചൊവ്വാഴ്ചയാണ് ജോലിക്ക് പോവുകയായിരുന്ന അജയനെ മൂവര്‍ സംഘം തടഞ്ഞു നിര്‍ത്തി കമ്പിവടികൊണ്ട് ആക്രമിച്ച്‌ വലതുകാല്‍ തല്ലിെയാടിച്ചത്. സംഭവം നടന്ന് ഒരാഴ്ച കഴിഞ്ഞിട്ടും നടപടി ആവാത്തതിനെത്തുടര്‍ന്ന് പെരുനാട് പോലീസില്‍ ബന്ധപ്പെട്ട മനുഷ്യാവകാശപ്രവര്‍ത്തകരോടും പട്ടികവര്‍ഗ പീഡന നിരോധന നിയമപ്രകാരം കേസെടുക്കണമെങ്കില്‍ മര്‍ദനത്തിനിരയായി വീട്ടില്‍ കഴിയുന്ന യുവാവ് ജാതി സര്‍ട്ടിഫിക്കറ്റ് ഹാജരാക്കിയേ കഴിയൂവെന്ന നിലപാടാണ് ആവര്‍ത്തിച്ചത്.
മര്‍ദനത്തിന് ശേഷവും നിരന്തരമായി ഫോണില്‍ വിളിച്ച്‌ വധഭീഷണി മുഴക്കുന്ന പ്രതികളെ സംരക്ഷിക്കുന്ന പോലീസ് നിലപാടാണ് ഇതെന്നും പ്രതികളെ അറസ്റ്റ് ചെയ്യാത്തപക്ഷം നിയമവിരുദ്ധമായി ആവശ്യമുന്നയിച്ച പോലീസ് ഉേദ്യാഗസ്ഥനെതിരെ പട്ടികജാതി-വര്‍ഗ നിയമപ്രകാരം കേസെടുക്കണമെന്നും അല്ലാത്തപക്ഷം കേരളത്തിലെ മുഴുവന്‍ ആദിവാസി സംഘടനകളും ബഹുജന പ്രക്ഷോഭത്തിന് തയാറാകുമെന്നും ദലിത് ആദിവാസി ഗോത്ര മഹാസഭ നേതാവ് എം. ഗീതാനന്ദന്‍ പറഞ്ഞു.
പോലീസ് നടപടിക്കെതിരെ നിയമനടപടികളുമായി മുന്നോട്ടുപോകുമെന്ന് സാമൂഹികപ്രവര്‍ത്തകരായ സി.ആര്‍. നീലകണ്ഠന്‍, കെ.എന്‍. ഷാജഹാന്‍, അഡ്വ.ബോബി തോമസ് എന്നിവരും പറഞ്ഞു. പോലീസ് ഉദ്യോഗസ്ഥനെതിരെ നടപടി ആവശ്യപ്പെട്ട് പോലീസ് രാജിനെതിരായ ജനകീയ കൂട്ടായ്മ സംസ്ഥാന കണ്‍വീനര്‍ ബിജു വി ജേക്കബ് മുഖ്യമന്ത്രിക്കും പോലീസ് കംപ്ലയിന്‍റ് അതോറിറ്റിക്കും പരാതി നല്‍കും.
