പെരിന്തൽമണ്ണ : യുവതിയെ താമസ സ്ഥലത്തേക്ക് വിളിച്ചുവരുത്തി മദ്യം നൽകി പീഡിപ്പിക്കുകയും തോക്കുചൂണ്ടി ഭീഷണിപ്പെടുത്തുകയും ചെയ്‌തെന്ന പരാതിയിൽ 2 പേർ അറസ്റ്റിൽ. അങ്ങാടിപ്പുറം പരിയാപുരം പറങ്കിമൂട്ടിൽ ജോൺ പി ജേക്കബ് (39), മണ്ണാർമല കല്ലിങ്ങൽ മുഹമ്മദ് നസീഫ് (34) എന്നിവരെയാണ് പെരിന്തൽമണ്ണ എസ്‌ഐ സി.കെ നൗഷാദിന്റെ നേതൃത്വത്തിൽ അറസ്‌റ്റ് ചെയ്‌തത്. ഞായർ വൈകിട്ട് മൂന്നരയോടെയാണ് കേസിനാസ്‌പദമായ സംഭവം.
ജോണിന്റെ വീട്ടിലേക്ക് ക്ഷണിച്ചു വരുത്തിയ യുവതിക്ക് മദ്യം കലർന്ന ജ്യൂസ് നൽകുകയായിരുന്നുവെന്ന് പോലീസ് പറഞ്ഞു. മയക്കിക്കിടത്തിയ ശേഷം പീഡിപ്പിക്കുകയായിരുന്നു. പുറത്തു പറഞ്ഞാൽ കൊല്ലുമെന്ന് തോക്കുചൂണ്ടി ഭീഷണിപ്പെടുത്തിയതായും പരാതിയിൽ പറയുന്നു. മുഹമ്മദ് നസീഫ് പീഡിപ്പിക്കാൻ സഹായം ചെയ്‌തു കൊടുത്തതായാണു പരാതി. പെരിന്തൽമണ്ണ കോടതി പ്രതികളെ റിമാൻഡ് ചെയ്‌തു.
