മൊബൈൽ നമ്പറും ഒടിപിയും ഒന്നും നൽകേണ്ട. മൊബൈലിലെ ക്യൂർകോഡ് സ്കാൻ ചെയ്ത് പണം ഇടപാടുകൾ നടത്താം. യുപിഐ സംവിധാനം കൂടുതൽ കാര്യക്ഷമമാക്കി രാജ്യത്തെ ആദ്യ യുപിഐ എടിഎം പ്രവർത്തനം ആരംഭിച്ചു. മുംബൈയിൽ ആണ് ആദ്യ എടിഎം സ്ഥാപിച്ചത്. നാഷണൽ പേയ്‌മെൻറ് കോർപ്പറേഷൻ ഓഫ് ഇന്ത്യയുമായി സഹകരിച്ച് ഹിറ്റാച്ചി പേമെന്റ് സർവീസസ് ആണ് എടിഎം അവതരിപ്പിച്ചത്. രാജ്യത്തെ ഡിജിറ്റൽ ഇടപാടുകളുടെ 50 ശതമാനവും ഇപ്പോൾ യുപിഐ അധിഷ്ഠിതമാണ്. യുപിഐ ഐഡിയുള്ള ആർക്കും ക്യൂആർ കോഡ് സ്കാൻ ചെയ്ത് എളുപ്പത്തിൽ പണം പിൻവലിക്കാൻ ആകും എന്നതാണ് പുതിയ എടിഎമ്മിൻെറ പ്രത്യേകത. എടിഎം കാർഡ് ഇല്ലാതെ തന്നെ ഇന്ത്യയിലെ ഗ്രാമ പ്രദേശങ്ങളിൽ പോലും ആളുകൾക്ക് പണ ലഭ്യത ഉറപ്പാക്കുക എന്നതാണ് നൂതന ആശയം എന്ന് നാഷണൽ പേമെന്റ് കോര്‍പ്പറേഷന്‍ ഓഫ് ഇന്ത്യ (എൻപിസിഐ) വ്യക്തമാക്കുന്നു.
എങ്ങനെയാണ് പണം പിൻവലിക്കുന്നത്?
*ഇതിന് എടിഎമ്മിൽ പിൻവലിക്കേണ്ട തുക തിരഞ്ഞെടുക്കുക.
*സ്ക്രീനിൽ യുപിഐ ക്യൂആർ കോഡ് പ്രദർശിപ്പിക്കും.
* ഫോണിലെ യുപിഐ ആപ്പ് ഉപയോഗിച്ച് ഈ കോഡ് സ്കാൻ ചെയ്യുക.
* യുപിഐ പിൻ നമ്പ‍ർ നൽകുക.
* പണം എടുക്കുക.
എന്താണ് മറ്റ് ഇടപാടുകളുമായുള്ള വ്യത്യാസം?
രാജ്യത്തെ വിവിധ ബാങ്കുകൾ ഇപ്പോൾ കാർഡ് ഇല്ലാതെ തന്നെ പണം പിൻവലിക്കാവുന്ന സേവനങ്ങൾ ഉപഭോക്താക്കൾക്ക് നൽകുന്നുണ്ട്. എന്നാൽ ഇതിൽ നിന്ന് യുപിഐ എടിഎം വ്യത്യസ്തമാണ്. മറ്റ് കാർഡ്-ലെസ് ഇടപാടുകളിലൂടെ പണം പിൻവലിക്കുമ്പോൾ ഇപ്പോൾ മൊബൈൽ നമ്പറും ഒടിപിയും നൽകണം. പക്ഷേ യുപിഐ എടിഎം പ്രവർത്തിക്കുന്നത് ക്യൂആർ കോഡ് അടിസ്ഥാനമാക്കി മാത്രമാണ്. ഗൂഗിൽ പേ പോലുള്ള ഏതെങ്കിലും യുപിഐ ആപ്ലിക്കേഷൻ ഇൻസ്റ്റാൾ ചെയ്തിട്ടുള്ള ഉപയോക്താക്കൾക്ക് ക്യൂആർ കോഡ് സ്കാൻ ചെയ്ത് എളുപ്പത്തിൽ പണം പിൻവലിക്കാം.
