ലോകേഷ് കനകരാജ് സംവിധാനം ചെയ്ത കമൽ ഹാസൻ ചിത്രം ‘വിക്രം’ത്തിന് തിയേറ്ററുകളിൽ വൻ വരവേൽപ്പാണ് ലഭിച്ചത്. വെള്ളിയാഴ്ച പുലർച്ചെ പ്രദർശനത്തിനെത്തിയ ചിത്രം കാണാൻ തിയേറ്ററുകളിൽ പ്രേക്ഷകർ നിറഞ്ഞിരുന്നു. വിരമിച്ച പൊലീസ് ഉദ്യോഗസ്ഥനായ വിക്രം എന്ന കഥാപാത്രമായി കമൽ ഗംഭീര പ്രകടനമാണ് കാഴ്ചവച്ചതെന്ന് സോഷ്യൽ മീഡിയ റിപ്പോർട്ട് ചെയ്യുന്നു. ചിത്രത്തിൽ അതിഥി വേഷത്തിലാണ് സൂര്യ എത്തുന്നത്. സൂര്യ സ്ക്രീനിൽ പ്രത്യക്ഷപ്പെട്ടപ്പോൾ പ്രേക്ഷകർ വലിയ ആവേശത്തോടെയാണ് കൈയടിച്ചത്.
ചിത്രം പ്രദർശിപ്പിക്കുന്ന മിക്ക തിയേറ്ററുകളിലും അഡ്വാൻസ് ബുക്കിംഗ് ആരംഭിച്ചിട്ടുണ്ട്. മിക്കയിടത്തും ഹൗസ്ഫുൾ ആയിരുന്നു. ആക്ഷനും വികാരങ്ങളും നിറഞ്ഞ ഒരു മികച്ച ത്രില്ലർ എന്നാണ് ചിത്രത്തെ വിശേഷിപ്പിക്കുന്നത്. ലോകേഷ് കനകരാജിന്റെ കാർത്തി നായകനായ കൈതിയുടെ അതേ ആവേശമാണ് വിക്രം നൽകുന്നതെന്ന് പ്രേക്ഷകർ പറയുന്നു. വിജയ് സേതുപതി, ഫഹദ് ഫാസിൽ, നരേൻ തുടങ്ങിയവർ മികച്ച പ്രകടനം കാഴ്ചവെച്ചു.
