കൊല്ലം: ദിവസവും നൂറുകണക്കിന് യാത്രക്കാര്‍ ആശ്രയിക്കുന്ന കൊല്ലം റെയില്‍വേ സ്റ്റേഷനില്‍ പൊതു ശുചിമുറിക്ക് പൂട്ടുവീണതോടെ പ്രാഥമികാവശ്യങ്ങള്‍ നിര്‍വഹിക്കാന്‍ സ്ഥലമില്ലാത്ത സ്ഥിതി. അഞ്ച് ദിവസത്തിലധികമായി ശുചിമുറികള്‍ പൂട്ടിയിട്ടിട്ട്.
ശുചിമുറികള്‍ക്ക് മുന്നില്‍ കസേര നിരത്തിയ കാഴ്ചയാണ് ഇപ്പോള്‍ കാണാനാകുക. സ്റ്റേഷനിലെത്തുന്ന വനിതകള്‍ ഉള്‍പ്പെടെ യാത്രക്കാര്‍ ഇത് കാരണം ഏറെ ബുദ്ധിമുട്ട് അനുഭവിക്കുകയാണ്. കൂടുതല്‍ പ്രശ്നം അനുഭവിക്കുന്നത് സ്റ്റേഷനില്‍ ക്ലീനിങ്ങിലും പാര്‍ക്കിങ്ങിലുമുള്ള താല്‍ക്കാലിക ജീവനക്കാരും റെയില്‍വേ സ്റ്റേഷന്‍ പരിസരത്തെ ഓട്ടോ, ടാക്സി തൊഴിലാളികളുമാണ്.
നാട്ടിലേക്ക് പോകുന്നതിന് സ്റ്റേഷന്‍ പരിസരത്ത് തമ്പടിച്ച ഇതര സംസ്ഥാന തൊഴിലാളികള്‍ ശുചിമുറികള്‍ വ്യാപകമായി ഉപയോഗിക്കുകയും കേടുപാട് വരുത്തുകയും ചെയ്യുന്നുവെന്ന പരാതി ഏതാനും ആഴ്ചകളായി ഉണ്ടായിരുന്നു. എന്നാല്‍ കോവിഡ് പശ്ചാത്തലത്തിലുള്ള തീരുമാനമെന്നാണ് ശുചിമുറികള്‍ പൂട്ടിയതിന് അധികൃതര്‍ നല്‍കിയ വിശദീകരണം.
റെയില്‍വേ ജീവനക്കാര്‍ക്ക് പ്രത്യേക ശുചിമുറി സൗകര്യമുള്ളതിനാല്‍ അവര്‍ക്ക് പ്രശ്നമില്ല. എന്നാല്‍ സ്റ്റേഷനിലെ പൊതുശുചിമുറികളെ ആശ്രയിച്ചിരുന്ന യാത്രക്കാര്‍ക്കും മറ്റ് ജീവനക്കാര്‍ ഉള്‍പ്പെടെ ഉള്ളവര്‍ക്കും പ്രാഥമികാവശ്യങ്ങള്‍ നിര്‍വഹിക്കാന്‍ പുറത്തെ കടകളിലോ ഒഴിഞ്ഞ കെട്ടിടങ്ങളുടെ മറയോ ഒക്കെ ആശ്രയിക്കേണ്ട സ്ഥിതിയാണ്.
എവിടെങ്കിലും ചെന്ന് ശുചിമുറി ഉപയോഗിച്ചോട്ടെ എന്ന് ചോദിക്കാനും കോവിഡ് സാഹചര്യത്തില്‍ ബുദ്ധിമുട്ട് ഏറെ. റെയില്‍വേ അനുവദിച്ച തിരിച്ചറിയല്‍ കാര്‍ഡുള്ള തങ്ങള്‍ക്ക് വേണ്ടി ശുചിമുറി തുറന്നുതരാന്‍ ഇതിനകം നിരവധി തവണ താല്‍ക്കാലിക ജീവനക്കാരും ഓട്ടോ, ടാക്സി തൊഴിലാളികളും ആവശ്യപ്പെട്ടുകഴിഞ്ഞു. എന്നാല്‍ മുകളില്‍ നിന്നുള്ള നിര്‍ദേശമാണെന്നു പറഞ്ഞ് ഒഴിവാക്കുകയാണെന്ന പരാതിയാണ് ഇവര്‍ക്കുള്ളത്.
