കൊരട്ടി: മാരക മയക്കുമരുന്നായ എംഡിഎംഎയുമായി യുവാവ് അറസ്റ്റിൽ. ആലുവ എടത്തല പീടികപ്പറമ്പിൽ അബ്ദുൾ കരീമിന്‍റെ മകൻ സദ്ദാം ഹുസൈൻ (32) ആണ് അറസ്റ്റിലായത്. എംഡിഎംഎ കൈവശം വച്ച് കാറിൽ സഞ്ചരിക്കുകയായിരുന്ന യുവാവിനെ വാഹന പരിശോധനയ്ക്കിടെ കൊരട്ടി സിഐ ബി.കെ.അരുണ്‍ ആണ് അറസ്റ്റ് ചെയ്തത്. ഞായറാഴ്ച രാത്രിയായിരുന്നു സംഭവം.
കാറിൽ വരികയായിരുന്ന പ്രതിയുടെ ഡ്രൈവിംഗിൽ അസ്വഭാവിക തോന്നിയ പോലീസ് വാഹനം തടഞ്ഞ് പരിശോധിക്കുന്നതിനിടെ 1.790 ഗ്രാം എംഡിഎംഎ ഇയാളിൽ നിന്നും കണ്ടെടുക്കുകയായിരുന്നു. ഇതു സംബന്ധിച്ച് കൂടുതൽ അന്വേഷണം നടത്തുമെന്ന് പോലീസ് പറഞ്ഞു. സിഐ ബി.കെ. അരുണിനു പുറമെ എസ്ഐമാരായ മുഹമ്മദ് ഷിഹാബ് കുട്ടശേരി, സജി വർഗീസ്, സഫീർ, സീനിയർ സിപിഒമാരായ സജിമോൻ, സജീഷ് കുമാർ എന്നിവർ ചേർന്നാണ് പ്രതിയെ പിടികൂടിയത്. പ്രതിയെ കോടതിയിൽ ഹാജരാക്കി.
