കൊല്ലം : കടയ്ക്കലില്‍ എട്ടാം ക്ലാസ് വിദ്യാര്‍ഥിനി ജീവനൊടുക്കിയ സംഭവത്തില്‍ പെണ്‍കുട്ടിയുടെ ബന്ധുക്കളായ മൂന്നു പേര്‍ പിടിയില്‍. ഡിഎന്‍എ പരിശോധനയിലൂടെയാണ് പ്രതികളെ കണ്ടെത്തിയത്. പെണ്‍കുട്ടി നിരന്തരം ലൈംഗിക പീഡനത്തിന് ഇരയായിരുന്നതായി പോസ്റ്റ്‌മോര്‍ട്ടത്തില്‍ കണ്ടെത്തിയിരുന്നു.
കഴിഞ്ഞ ജനുവരി 23നാണ് പട്ടികജാതിക്കാരിയായ പതിമൂന്നുകാരി ജീവനൊടുക്കിയത്. വീടിനുള്ളില്‍ തൂങ്ങിനിന്ന കുട്ടിയെ ആശുപത്രിയിലെത്തിച്ചെങ്കിലും മരണം സംഭവിക്കുകയായിരുന്നു. തുടര്‍ന്നുളള പോസ്റ്റ്മോര്ട്ടം പരിശോധനയിലാണ് പീഡനത്തിനിരയായെന്ന വിവരം കണ്ടെത്തിയത്. മരണത്തിന് തൊട്ടുമുമ്പുള്ള ദിവസങ്ങളില്‍വരെ പീഡനം നടന്നിട്ടുണ്ടെന്നായിരുന്നു കണ്ടെത്തല്‍. പോസ്റ്റുമോര്‍ട്ടം റിപ്പോര്‍ട്ട് കിട്ടിയിട്ടും പോലീസ് നടപടിയെടുക്കുന്നില്ലെന്നാരോപിച്ച്‌ പെണ്‍കുട്ടിയുടെ മാതാപിതാക്കള്‍ മുഖ്യമന്ത്രിക്കും ഡിജിപിക്കും പരാതി നല്‍കിയിരുന്നു.
